Փաշինյանը պատասխանել է վարչապետին հրապարակում ընտրելու անընդունելիության մասին Կարապետյանի հայտարարությանը

ԵՐԵՎԱՆ, 25 ապրիլի. /Նովոստի Արմենիա/. Ընդդիմության առաջնորդ Նիկոլ Փաշինյանը պատասխանել է ՀՀ վարչապետի պաշտոնակատար Կարեն Կարապետյանի հայտարարությանն այն մասին, որ նոր վարչապետը չի կարող ընտրվել հրապարակում ու նշել է, որ նա չի առաջարկել, որպեսզի կառավարության ղեկավարին ընտրեն հրապարակում։

ՀՀ վարչապետի պաշտոնակատար Կարեն Կարապետյանը չորեքշաբթի լրագրողներին հայտարարեց, որ ժողովրդի ընտրյալը չի կարող ընտրվել հրապարակում, դրա համար հարկավոր են օրինական ընթացակարգեր։ Նա նշեց, որ վարչապետի ընտրություններն Ազգային ժողովի քաղաքական ուժերի ընտրություն է, հետևաբար քաղաքական ուժերը պետք է հավաքվեն և որոշում կայացնեն, թե ինչպես անցկացնեն ընտրությունները, ինչպես են փոխվում խաղի կանոնները։

«Մենք չենք ասել, որ վարչապետին պետք է ընտրի հրապարակը, մենք ասել ենք, որ նոր վարչապետին պետք է ընտրի խորհրդարանը` օրենքին համաձայն, իսկ հրապարակը պետք է սատարի Ազգային ժողովի կողմից ընտրված թեկնածուին», - հայտարարել է Փաշինյանը:

Նա նշել է նաև, որ եթե ՀՀԿ-ի անդամները չեն ցանկանում այս օրերին ՀՀ–ում ծավալված գործընթացների կրկնություն, ապա նրանք կքվեարկեն ժողովրդական վարչապետի օգտին:

«ՀՀԿ-ում պետք է հասկանան, որ անհնար է խափել ժողովրդին ու վարչապետի պաշտոնում կուսակցության մի անդամին փոխարինել մյուսով: ՀՀԿ-ն այլևս իշխանություն չէ երկրում, իշխանությունը երկրում պատկանում է ժողովրդին, ու դա պետք է ամրապնդել», - հայտարարել է նա:–0–