Փաշինյան. հայկական իշխանությունների քաղաքականությունը հանգեցնում է աղքատության խորացման

ԵՐԵՎԱՆ, 30 հոկտեմբերի. /Նովոստի–Արմենիա/. «Ելք» ընդդիմադիր խմբակցության ղեկավար Նիկոլ Փաշինյանը երկուշաբթի ԱԺ–ում կազմակերպված ճեպազրույցի ժամանակ նշեց, որ Հայաստանի 2018 թ.–ի պետբյուջեն ոչ ադեկվատ է։

Երկուշաբթի խորհրդարանական հանձնաժողովներում մեկնարկել են ՀՀ 2018 թ.–ի պետական բյուջեի նախագծի քննարկումները։ Երկու շաբաթվա ընթացքում պատգամավորները պրոֆիլային հանձնաժողովներում կքննարկեն երկրի հիմնական ֆինանսական փաստաթղթի բոլոր դրույթները, կներկայացնեն առաջարկներ, որոնք կքննարկվեն խորհրդարանական նստաշրջանի ընթացքում։


«Խորհրդարանական մեծամասնությունը վարում է աղքատությունը խորացնող քաղաքականություն», – կարծում է Փաշինյանը։

Այս կապակցությամբ նա նաև նշեց, որ վերջին երեք տարվա ընթացքում կենսաթոշակներն ու սոցիալական նպաստները չեն ավելանում, սակայն միաժամանակ գրանցվում է գնաճ, և այն շարունակվում է։

«2018 թ.–ին գնաճը նախատեսված է 4 տոկոսի սահմանում, իսկ 2017 թ.–ին այդ ցուցանիշը կազմում էր 2,7 տռոկոս, այսինքն միայն երկու տարվա տվյալներով` գնաճը կազմում է 6,7 տոկոս։ Հետևաբար, եթե կենսաթոշակներն ու սոցիալական նպաստները չեն ավելանում, արդյոք, դա չի՞ նշանակում, որ կառավարությունը վարում է մի քաղաքականություն, որը ոչ թե միտված է աղքատության հաղթահարմանը, այլ խորացնում է այն», – հայտարարեց Փաշինյանը։

Պատգամավորը նաև ընդգծեց, որ 2018 թ.–ի հունվարի 1–ից կգործեն ԵՏՄ–ի նոր մաքսային, հարկային դրույքները, ինչի հետևանքով լայն սպառման մի շարք ապրանքների գները կաճեն։

ՀՀ կառավարությունը սեպտեմբերի 28–ի նիստի ժամանակ հավանություն է տվել 2018 թ.–ի պետբյուջեի նախագծին։ 2018 թ.–ի պետբյուջեի եկամուտների համախառն ծավալը նախատսված է 1 տրիլիոն 307 մլրդ դրամի չափով, ծախսերը` 1 տրիլիոն 464,2 մլրդ դրամ։ Պակասուրդը նախատեսված է 156,8 մլրդ դրամի չափով ($1 - 482,24 դրամ)։ -0-