Փաշինյան. հայ–վրացական հարաբերությունները հարկավոր է պաշտպանել աշխարհաքաղաքականությունից
ԵՐԵՎԱՆ, 1 մայիսի. /Նովոստի–Արմենիա/. Հայ–վրացական հարաբերությունները հարկավոր է մաքսիմալ կերպով պաշտպանել աշխարհաքաղաքական ներգործություններից, հայտարարեց ՀՀ վարչապետի թեկնածու Նիկոլ Փաշինյանը ՀՀ ԱԺ հատուկ նիստի ընթացքում։
Մայիսի 1–ին ԱԺ–ում անցկացվում են ՀՀ վարչապետի ընտրությունները։
«Շատ դեպքերում մեր լարվածությունն առաջացել է ոչ թե մեր միջև ընթացող գործընթացների բնական պատճառներով, այլ այն պատճառով, որ հայ–վրացական հարաբերությունները դիտարկվել են այլ հարաբերությունների պրիզմայով», – ասաց նա` պատասխանելով հայ–վրացական հարաբերությունների հեռանկարների մասին պատգամավորներից մեկի հարցին։
Նրա խոսքով, եղել են բարիդրացիական հարաբերությունները խեղաթյուրելու և որոշակի ռիսկեր ստեղծելու բազմաթիվ փորձեր։
«Բարեբախտաբար, և' Հայաստանում, և' Վրաստանում կա այդ ռիսկերի նկատմամբ վերահսկողության որոշակի մթնոլորտ։ Անհրաժեշտ է գործարկել նոր քաղաքականություն Վրաստանի հետ հարաբերություններում և այդ երկրի հայ բնակչության նկատմամբ վերաբերմունքում։ Երկու երկրների էության նկատմամբ անհրաժեշտ փոխադարձ հարգանքը պետք է հիմնաքար դառնա հայ–վրացական բարեկամության զարգացման գործում», – ասաց նա։
Փաշինյանը նշեց, որ ո'չ Հայաստանը, ո'չ Վրաստանը չպետք է ունենան որևէ նկրտումներ միմյանց նկատմամբ։
«Սակայն դա չի նշանակում, որ մենք պետք է վախենանք խոսել խնդիրների մասին։ Բոլոր հարցերը պետք է քննարկվեն և ստանան բարիդրացիական լուծում», – ասաց նա։–0–
