ՊՊԾ գնդի մոտակայքում անկարգությունների հետևանքով տուժածներից 16-ը դեռ հիվանդանոցում են. ԱՆ

ԵՐԵՎԱՆ, 3 օգոստոսի. /Նովոստի-Արմենիա/. Հուլիսի 17-ին ՊՊԾ գնդի տարածքի գրավումից և դրան հաջորդած իրադարձություններից հետո 16 մարդ դեռ շարունակում է ստանալ ստացիոնար բժշկական օգնություն, «Նովոստի-Արմենիա» գործակալությանը հայտնեց Առողջապահության նախարարության մամուլի քարտուղար Անահիտ Հայթայանը:

«Ծանր վիրավորում ստացած ոստիկանից բացի, մնացած բոլոր տուժածների վիճակը գնահատվում է բավարար», - հայտնեց Հայթայանը:

Մամուլի քարտուղարի հաղորդմամբ, ոստիկանը, ով վերջերս երկրորդ անգամ էր վիրահատվել, ծայրահեղ ծանր վիճակում է, դրական դինամիկա չի գրանցվում:

«Սարի թաղում բախումների հետևանքով աչքից զրկված երիտասարդն իրեն նորմալ է զգում, նրա վիճակը գնահատվում է միջին ծանրության», - ասաց նա:

Ընդդիմադիր Ժիրայր Սեֆիլյանի զինված կողմնակիցները հուլիսի 17–ին մուտք են գործել ՊՊԾ գնդի տարածք։ Նրանք պահանջում էին ազատ արձակել Ժիրայր Սեֆիլյանին, ով կալանավորվել էր շուրջ մեկ ամիս առաջ մի խումբ անձանց կողմից զենք ապօրինի պահելու կասկածանքով։

Երևանի ՊՊԾ գնդի գրավված շենքի մոտ հուլիսի 30-ին անցկացվող ակցիայի ցրման ժամանակ հիմնականում ոստիկանության կողմից կիրառված հատուկ միջոցների հետևանքով տուժել է մի քանի տասնյակ մարդ, այդ թվում Սարի թաղի բնակիչները:

Հուլիսի 31-ին զինված խումբը զենքը վայր է դրել և հանձնվել իշխանություններին: Այս ընթացքում զոհվել են ոստիկանության երկու աշխատակից: Զինված խմբի անդամների և իրավապահ մարմինների աշխատակիցների շրջանում եղել են վիրավորներ: -0-