«Նուբարաշեն» ՔԿՀ–ում մահացել է հայկական կուսակցություններից մեկի փոխնախագահը
ԵՐԵՎԱՆ, 26 հունվարի./Նովոստի–Արմենիա/. «Հայոց արծիվներ. Միասնական Հայաստան» կուսակցության փոխնախագահ Մհեր Եղիազարյանը մահացել է «Նուբարաշեն» ՔԿՀ–ում։
Ինչպես նշվում է Քննչական կոմտեի Facebook–յան էջում, ՀՀ քննչական կոմիտեի ԵՔՔՎ Էրեբունի և Նուբարաշեն վարչական շրջանի քննչական բաժնում քննություն է տարվում՝ պարզելու «Նուբարաշեն» քրեակատարողական հիմնարկում մեղադրյալ Մհեր Եղիազարյանի մահվան հանգամանքները։ Նշանակվել է դատաբժշկական փորձաքննություն։ Քննության արդյունքների մասին կտեղեկացնենք լրացուցիչ։
ԶԼՄ–ների հաղորդմամբ, Եղիազարյանն, ի նշան բողոքի, հացադուլ էր հայտարարել։
Ավելի վաղ ՀՀ ԱԱԾ–ն հաղորդագրություն էր տարածել` նշելով, որ «Հայոց Արծիվներ. Միասնական Հայաստան» կուսակցության փոխնախագահ, «Haynews.am» լրատվական կայքի պատասխանատու Մհեր Եղիազարյանը, խաբեությամբ ուրիշի գույքի հափշտակություն կատարելու դիտավորությամբ, 2014թ. փետրվարից մինչև 2018թ. հոկտեմբերն ընկած ժամանակահատվածում, անձամբ, կամ միջնորդների միջոցով, չարաշահելով ՀՀ մի շարք քաղաքացիների, այդ թվում առանձին զինծառայողների վստահությունը, ծառայության կամ աշխատանքի տեղավորելու, ծառայողական առաջխաղացման, կամ այլ տարաբնույթ հարցեր լուծելու համար, կաշառք տալու պատրվակով նրանցից պահանջել, ստացել և առանց որևէ գործողություն կատարելու խարդախությամբ հափշտակել է 180 հազար դրամից մինչև առանձնապես խոշոր չափերի հասնող՝ 10 հազար ԱՄՆ դոլարին համարժեք 4 մլն 775 հազար ՀՀ դրամ:
