ԵՐԵՎԱՆ, 16 դեկտեմբերի. /Նովոստի–Արմենիա/. «Նովոստի–Արմենիա» գործակալության թղթակից Իննա Վերլինսկայան արժանացել է մրցանակային երկրորդ տեղին Մարդկանց թրաֆիքինգի և շահագործման դեմ պայքարի լուսաբանման ամենամյա մրցույթի «Տպագիր և առցանց լրատվամիջոցներ» անվանակարգում։
Մրցույթն անցկացվում է արդեն 5–րդ անգամ ՀՀ–ում մարդկանց թրաֆիքինգի և շահագործման դեմ պայքարի հարցերով խորհրդի և Ինֆորմացիայի ազատության կենտրոնի կողմից։
«Թրաֆիքինգի դեմ պայքարի հարցում չափազանց կարևոր է անցկացվող միջոցառումների լուսաբանումը, որտեղ մեծ դեր է խաղում կանխարգելիչ միջոցառումների անցկացման հնարավորությունն ու հասարակությանը ժամանակին իրազեկելը», – մրցանակաբաշխության արարողության ժամանակ ասաց ՀՀ փոխվարչապետ, Միջազգային տնտեսական ինտեգրման և բարեփոխումների նախարար Վաչե Գաբրիելյանը, ով ղեկավարում է Հայաստանի Հանրապետությունում մարդկանց թրաֆիքինգի և շահագործման դեմ պայքարի հարցերով խորհուրդը։
Նա ընդգծեց, որ չնայած Հայաստանում թրաֆիքինգի աղմկահարույց դեպքերի բացակայությանը, այս թեման, ամեն դեպքում, պետք է գտնվի լրագրողների ուշադրության կենտրոնում։
Ինչպես նշեց Ինֆորմացիայի ազատության կենտրոնի նախագահ Լիանա Դոյդոյանը, ժյուրին ուսումնասիրել է շուրջ 12 աշխատանք, որոնք հրապարակվել են 2015 թ.–ի նոյեմբերի 1–ից 2016 թ.–ի հոկտեմբերի 31–ն ընկած ժամանակահատվածում։
Մրցանակակիրներն ընտրվել են երկու անվանակարգերում` «Հեռուստատեսություն և ռադիո» և «Տպագիր և առցանց լրատվամիջոցներ»։ Աշխատանքները գնահատվել են իրենց մասնագիտական մակարդակով, ինչպես նաև դրանց ռեզոնանսային մակարդակով։
«Հեռուստատեսություն և ռադիո» անվանակարգում առաջին տեղը զբաղեցրել է «Երկիր մեդիա» հեռուստաընկերության լրագրող Նունե Հովսեփյանը։ Նույն անվանակարգում երկրորդ և երրորդ տեղերը զբաղեցրել են «Ար» հեռուստաընկերության լրագրող Արմեն Հայրապետյանն ու «Երկիր մեդիայի» լրագրող Սոնա Խաչատրյանը։
«Տպագիր և առցանց լրատվամիջոցներ» անվանակարգում առաջին տեղ չի շնորհվել։ Երկրորդ տեղը զբաղեցրել է «Նովոստի–Արմենիա» գործակալության լրագրող Իննա Վերլինսկայան
«Ինչպե՞ս չդառնալ թրաֆիքինգի զոհ» նյութի համար։ Երրորդ տեղին արժանացել է Yerkir.am–ի լրագրող Թագուհի Մելքոնյանը։
«Ինչպե՞ս չդառնալ թրաֆիքինգի զոհ» նյութը հրապարակվել է նոր` հայկական շուկայում աննախադեպ նախագծի`
«Բլոկնոտի» շրջանակում, որը «Նովոստի–Արմենիա» գործակալությունը ներկայացրել է 2016 թ.–ին։ «Բլոկնոտը» native գովազդի բաժին է, որն առանցքային տեղ է զբաղեցնում ժամանակակից թվային մարկետինգի ոլորտում և օգնում է պատվիրատուին ավելացնել հաճախորդների թիվն ու վաճառքների ծավալը։
Մրցանակակիրներն արժանացել են հավաստագրերի և 100 հազարից մինչև 300 հազար դրամի չափով պարգևատրման։–0–
