ԵՐԵՎԱՆ, 23 ապրիլի./Նովոստի–Արմենիա/. Րոպեներ առաջ Երևանի ձերբակալվածների պահման վայրից (ՁՊՎ) ազատ արձակվեց ԱԺ պատգամավոր, ԵԼՔ խմբակցության ղեկավար Նիկոլ Փաշինյանը, Սասուն Միքայելյանը և Արարատ Միրզոյանը նույնպես ազատ արձակվեցին։
Ապրիլի 22–ին Փաշինյանը, ինչպես նաև Արարատ Միրզոյանն ու Սասուն Միքայելյանը բերման ենթարկվեցին երթի ժամանակ, ՀՀ գլխավոր դատախազությունը ձերբակալման միջնորդություն ներկայացրեց ԱԺ–ին։ Երկուշաբթի առաջին փոխվարչապետ Կարեն Կարապետյանը հայտարարեց, որ կհանդիպի Փաշինյանի հետ և կդիմի գլխավոր դատախազին պատգամավորների մասին միջնորդությունն ԱԺ–ից հետ վերցնելու համար։
«Հայաստանում իշխանափոխություն է եղել», – ասաց Փաշինյանը` մեկնաբանելով պատճառները, որոնց արդյունքում երկրի իշխանություններն ազատեցին նրան։
Նա տեղեկացրեց, որ կպատասխանի բոլոր հարցերին երեկոյան նախատեսված հանրահավաքի ժամանակ։
«Բոլոր հարցերին, այդ թվում` առաջին փոխվարչապետ Կարեն Կարապետյանի հետ իմ հանդիպման մասին հարցերին կպատասխանեմ ավելի ուշ։ Իսկ հիմա ես կզբաղվեմ բոլոր ակտիվիստների և մեր շարժման մասնակիցների ազատ արձակմամբ», – հայտարարեց Փաշինյանը։
Ապրիլի 13–ին «Ելք» ընդդիմադիր խմբակցության ղեկավար, «Քաղաքացիական պայմանագիր» կուսակցության ղեկավար Նիկոլ Փաշինյանը Երևանում անցկացնում է շուրջօրյա հանրահավաքներ Սերժ Սարգսյանի վարչապետության դեմ։ Ապրիլի 16–ից հանրահավաքները վերածվեցին քաղաքացիական անհնազանդության համաքաղաքային ակցիաների։ Բողոքներն ուղեկցվում են բախումներով ցուցարարների և իրավապահների միջև, մասնավորապես, Բաղրամյան պողոտայում, փողոցների և առանցքային մայրուղիների, ինչպես նաև պետական հաստատությունների շենքերի արգելափակմամբ։ Ապրիլի 17–ին կազմակերպված հանրահավաքի ժամանակ Փաշինյանը հայտարարեց «թավշյա» հեղափոխության մասին։
Կիրակի` ապրիլի 22–ին, «Մարիոթ» հյուրանոցում «Ելք» ընդդիմադիր կուսակցության ղեկավար Նիկոլ Փաշինյանի հետ կայացած հանդիպմանը ՀՀ վարչապետ Սերժ Սարգսյանը շանտաժ է անվանել ընդդիմության գործողությունները: Նա զգուշացրել է, որ այդ գործողությունների շարունակության դեպքում ամբողջ պատասխանատվությունը ընկնելու է ընդդիմության վրա: Սերժ Սարգսյանի գնալուց հետո Փաշինյանը նշել է, որ ակցիաներն ամբողջ հանրապետությունում կշարունակվեն կրկնակի ծավալով: Ավելի ուշ Արցախի պողոտայում անցկացվող երթի ժամանակ Նիկոլ Փաշինյանը, ինչպես նաև «Քաղաքացիական պայմանագիր» կուսակցության վարչության անդամ Սասուն Միքայելյանը բերման են ենթարկվել: Ավելի ուշ Գլխավոր դատախազությունը հանդես եկավ հայտարարությամբ` նշելով, որ պատգամավորներ Նիկոլ Փաշինյանը, Սասուն Միքայելյանն ու Արարատ Միրզոյանը ձերբակալվել են։–0–
