Կարեն Կարապետյանն անցկացրել է ներկա կազմով կառավարության վերջին նիստը

ԵՐԵՎԱՆ, 3 մայիսի. /Նովոստի Արմենիա/. Հայաստանի կառավարությունը վերջին նիստն է անցկացրել ներկա կազմով:

«Այսօր այս կազմով կառավարության վերջին նիստն է, և ես ուզում եմ բոլորիդ շնորհակալություն հայտնել համատեղ աշխատանքի համար: Եղել է շատ հետաքրքրիր ժամանակահատված», - ասել է ՀՀ վարչապետի պաշտոնակատար Կարեն Կարապետյանը:

Միաժամանակ նա նշել է, որ կառավարությունը պետք է հաշվետվություն ներկայացնի հասարակությանն այս ժամանակահատվածում կատարած աշխատանքի համար:

«Եվ իմ վերջին հանձնարարականը և խնդրանքը բոլոր գործընկերներին՝ բարեխղճորեն կատարում ենք մեր պարտականությունները մինչև կառավարության նոր կազմի ձևավորումը: Պետական պաշտոնյայի գործառույթը պետք է մինչև վերջ կատարվի՝ անկախ էմոցիայից, անկախ արդար թե անարդար քննադատությունից»,-նշել է Կարեն Կարապետյանը:

Վարչապետի պաշտոնակատարը նշել է նաև, որ կառավարության այսօրվա նիստի օրակարգում ընդգրկվել են ընթացիկ հարցեր: «Չենք ընդգրկել մեր աշխատակազմում գտնվող ֆունդամենտալ հարցեր սոցիալ-տնտեսական, եկամտահարկի իջեցման, առողջապահության ապահովագրության վերաբերյալ, որպեսզի հնարավորություն տանք հաջորդ կառավարությանը որոշելու՝ անել դա, թե ոչ»,-ասել է Կարեն Կարապետյանը:-0-