Կապանի ԲԿ–ն` սկանդալի կենտրոնում. 5 մահ և բռնաբարության փորձ 20 օրվա ընթացքում

ԵՐԵՎԱՆ, 19 հունվարի. /Նովոստի–Արմենիա/. Սյունիքի մարզպետ Վահե Հակոբյանը մեկնաբանել է Կապանի ԲԿ–ի տնօրեն Սմբատ Օրբելյանին աշխատանքից ազատելու մասին աղմկահարույց որոշումը։

Yerkir.am–ին տված հարցազրույցում Հակոբյանը նշել է, որ 20 օրվա ընթացքում Կապանի ԲԿ-ում արձանագրվել է 5 մահ, 4-ը երեխաներ են։

«Մարզպետարանում ստեղծվել է հանձնաժողով, որն ուսումնասիրել է բոլոր դեպքերը: Ի հայտ են եկել և' կազմակերպչական, և' բուժանձնակազմի հետ կապված խախտումներ», – նշել է Հակոբյանն ու ավելացրել, որ հարուցվել է քրեական գործ։

Կապանում ծննդկան է մահացել. երեխան մահացած է ծնվել

Մարզպետի խոսքով, Օրբելյանին առաջարկվել էր դիմում գրել, սակայն նա հրաժարվել է։

Հակոբյանի խոսքով, հիմա քաղաքում փորձ է կատարվում տուժողներին գումարով կամ այլ կերպով համոզել, որ նրանք իրենց դիմումները հետ վերցնեն:

«Անընդունելի իրավիճակ է ստեղծվել քաղաքում, որը պահանջում է հանգուցալուծում, ինչն էլ ես արել եմ», – հայտարարել է նա։

Մարզպետը նաև հայտնել է օրերս ԲԿ-ում տեղի ունեցած դեպքի մասին` ԲԿ-ի մեկ այլ բժշկի կողմից բռնաբարության փորձ է եղել հիվանդի նկատմամբ, և նշել, որ «զարմանալ պետք չէ, որ ԲԿ-ի տնօրենին հեռացրել են պաշտոնից»:–0–