ՃՈ–ն բարիանում է. դրական փոփոխություններ են սպասվում

ԵՐԵՎԱՆ, 22 փետրվարի./Նովոստի–Արմենիա/. Ճանապարհային ոստիկանությունում սպասվում են դրական փոփոխություններ։

Ինչպես գրում է «Հայկական ժամանակը», ճանապարհային երթևեկության կանոնները խախտելու համար նշանակված տուգանքը քաղաքացու կողմից սահմանված ժամկետում չվճարելու համար 25 և 50 տոկոսի չափով ավելացումների ինստիտուտը կվերանա մինչև այս տարվա հուլիսի 1-ը։

Այսպիսի դրույթ է ներառված «ճանապարհային ոստիկանության համակարգի բարեփոխումների հայեցակարգում», որի նախագիծը կքննարկվի կառավարության առաջիկա նիստում։

«Մինչև 2014 թ. տուգանքն ուշացնելու դեպքում այն կրկնապատկվում, ապա եռապատկվումէԷր, բայց հանրային դժգոհությունների պատճառով իշխանությունը հրաժարվեց դրանից։ Հիմա ոստիկանությունը կամովին որոշել է հրաժարվել նաև 25 և 50 տոկոս ավելացումներից։ Ուշագրավն այն է, որ դա պետք է իրականացվի 2017թ. երկրորդ եռամսյակում, ինչը ենթադրում է օրենսդրական փոփոխություն», –նշում են հոդվածի հեղինակները։

Դրանից էլ ակնհայտ է դառնում, որ օրենսդրության մեջ համապատասխան փոփոխությունների վերաբերյալ քննարկումները կսկսվեն մինչև խորհրդարանական ընտրությունները և կունենան հանրային դրական արձագանք։

«Թերևս այստեղ է պետք փնտրել ոստիկանության՝ կամովին բարիանալու գաղտնիքը»,–գրում է թերթը։–0–