Հայաստանը ներդնում է ԴՆԹ–թեստավորում փոխնակ մայրերից ծնված երեխաների համար

ԵՐԵՎԱՆ, 26 հոկտեմբերի. /Նովոստի–Արմենիա/. ՀՀ կառավարությունը հինգշաբթի նիստի ժամանակ փոփոխություններ կատարեց ԴՆԹ–թեստի և նմուշառման իրականացման կարգում և ժամկետներում։

Ինչպես նիստի ժամանակ նշեց ՀՀ առողջապահության փոխնախարար Սերգեյ Խաչատրյանը, կարգով նախատեսվում է փոխնակ մորից ծնված երեխայի ԴՆԹ–թեստավորում անցկացնել։

«Դա թույլ կտա համոզվել փոխնակ մորից ծնված երեխայի և նրա կենսաբանական ծնողների միջև արյունակցական կապի հարցում մինչև երեխային նրա կենսաբանական ծնողներին հանձնելը», – ասաց Խաչատրյանը։

Հաստատվել է նաև փոխնակ մայրության մասին եռակողմ համաձայնագրի ձևաչափը, որում հստակ նշված են կողմերի իրավունքներն ու պարտավորությունները, վերարտադրողական գործընթացի կազմակերպման և իրականացման հարցերը, ինչպես նաև կողմերի ֆինանսական պարտավորությունները։

ՀՀ առողջապահության նախարարության տվյալներով, Հայաստանում ամեն տարի մոտ 30–40 մարդ դիմում է փոխնակ մայրերի ծառայություններին։–0–