ԵՐԵՎԱՆ, 13 հուլիսի. /Նովոստի–Արմենիա/. Ռուսաստանցիների համար առանց վիզայի երկրների ցանկում կա մոտ 70 պետություն, որոնց թվում են Վանուատուն, Նիուեն, որոնք գտնվում են Խաղաղ օվկիանոսում, Վիետնամն ու Թաիլանդը։
Life–ն ընտրել է արձակուրդների համար լավագույն ուղղությունները և ներկայացրել առանց վիզայի երկրներում հանգստանալու հրահանգները` ինչպես հասնել, ինչ դիտել և որքան արժե։ Ներկայացվում են բավականին օգտակար խորհուրդներ։
Հայաստանը 2016 թ.–ին ռուսաստանցիների հանգստի ամենահայտնի վայրերից մեկը կդառնա>>
Ամեն մարդ կգտնի այն, ինչ փնտրում է. հանգստանալ Մոնտենեգրոյի ծովափնյա վայրերում, ուսումնասիրել Մակեդոնիայի տեսարժան վայրերը կամ ըմբոշխնել Հայաստանի անուշաբույր ճաշատեսակները։
Տարեկան այս երկրներ են այցելում միլիոնավոր ռուսաստանցիներ (2015 թ.–ին Ղազախստան է այցելել 3,1 մլն զբոսաշրջիկ, Վրաստան` 650 հզար։ Նրանք ներառվել են լավագույն 15 ուղղությունների ցանկում)։ Զբոսաշրջիկներից ոմանք ներկայացրել են իրենց տպավորությունները (հեղինակի խոսքը պահպանված է)։
Հայաստան. «Այցելեցի Երևան, Ջերմուկ, Դիլիջան, Սևան, Էջմիածին, Ստեփանակերտ և Շուշի։ Ամռանը նախատեսում եմ այցելել ևս մեկ անգամ և լինել մյուս քաղաքներում, բարձրանալ սար և լողանալ Սևանում ու գետերում։ Ինչ կարող եմ ասել...Սա դրախտ է երկրի վրա։ Բնությունը, ճարտարապետությունը, հնագույն պատմությունը, խոհանոցը, իսկ ամենագլխավորը` մարդիկ` բարեհամբույր, հյուրընկալ և գեղեցիկ։ Հայաստանը գերել է ինձ»։
Life–ը խորհուրդ է տալիս ճանապարհորդներին այցելել Հայաստան, մասնավորապես` Տաթևի վանական համալիր, նստել աշխարհի ամենաերկար ռևերսային ճոպանուղին, համտեսել հայկական խորովածը, զմայլվել բիբլիական Արարատով և Երևանի կենտրոնում գործող երգող շատրվաններով, ինչպես նաև ծանոթանալ հայկական կոնյակի պատրաստման գործընթացին։ Զբոսաշրջիկի համար նախատեսված հուշաթերթիկում ներկայացված են ավիատոմսի և տրանսպորտի գները, ինչպես նաև տարվա լավագույն եղանակները Հայաստան այցելելու համար։
Այլ երկրների ցանկում ներկայացված են նաև Ղազախստանը, Մարոկկոն, Վրաստանը, Մակեդոնիան, Մոնղոլիան, Սերբիան, Մոնտենեգրոն և Իրանը։ –0–
