Հայաստանում սպասվում է բարձր ջերմային ֆոն և բարձր կարգի հրդեհավտանգ իրավիճակ

ԵՐԵՎԱՆ, 22 հուլիսի. /Նովոստի-Արմենիա/. Հայաստանում կարճատև անձրևների հետ մեկտեղ, սպասվում է բարձր ջերմային ֆոն և բարձր կարգի հրդեհավտանգ իրավիճակ, հաղորդում է Հայպետհիդրոմետը:

Օդերևութաբանները զգուշացնում են, որ հուլիսի 22-ին Սյունիքի հովիտներում և Արարատյան դաշտում սպասվում է բարձր ջերմային ֆոն և բարձր կարգի հրդեհավտանգ իրավիճակ: Ուլտրամանուշակագույն ճառագայթման ինտենսիվությունը սպասվում է նորմայից բարձր:

«Խորհուրդ է տրվում խուսափել արևի ուղիղ ճառագայթներից և ֆիզիկական ակտիվությունից», - նշվում է հաղորդագրության մեջ:

Բացի այդ, առաջիկա օրերին հանրապետության տարածքում սպասվում են կարճատև անձրևներ, իսկ օդի ջերմաստիճանը 23-25-ին կնվազի 5-7 աստիճանով:

Մասնավորապես, հուլիսի 22-ին` հյուսիսային շրջաններում, հուլիսի 23-24-ին և 26-ին` շրջանների մեծ մասում, 25-ին` հարավ-արևելյան շրջաններում երեկոյան ժամերին սպասվում է կարճատև անձրև և ամպրոպ:

Ամպրոպի ժամանակ սպասվում է քամու ուժգնացում` 15-20 մ/վրկ արագությամբ: Քամին կլինի հյուսիս-արևելյան` 2-7 մ/վրկ արագությամբ:

Երևանում հուլիսի 22-ին և 25-ին սպասվում է առանց տեղումների եղանակ: Հուլիսի 23-24-ին և 26-ին երեկոյան ժամերին սպասվում է ամպրոպ, կա կարճատև անձրևի հավանականություն: Ամպրոպի ժամանակ սպասվում է քամու ուժգնացում` 15-17 մ/վրկ արագությամբ:

Հուլիսի 22-ին Երևանում ցերեկային ժամերին սպասվում է +37...+39 աստիճան, գիշերը՝ +20...+22: Հուլիսի 23–ին ցերեկային ժամերին կանխատեսվում է +34...+36 աստիճան, գիշերը` +19...+21։ Հուլիսի 24-ին ցերեկային ժամերին կանխատեսվում է +33...+35, գիշերը` +19...+21։ –0–