Հայաստանում իշխանափոխություն տեղի չի ունեցել. Կոստանյան

ԵՐԵՎԱՆ, 27 ապրիլի./Նովոստի–Արմենիա/. Հայաստանում իշխանափոխություն տեղի չի ունեցել, ուրբաթ լրագրողներին ասել է ՀՀ ԱԺ պետաիրավական հարցերի և մարդու իրավունքների պաշտպանության մշտական հանձնաժողովի նախագահ, նախկին գլխավոր դատախազ Գևորգ Կոստանյանը։

«Իշխանափոխություն տեղի չի ունեցել մի պարզ պատճառով. ցանկացած մարդ, որ գոնե մի անգամ ընթերցել է մեր Սահմանադրությունը կհասկանա` ինչ է նշանակում իշխանափոխություն։ Խորհրդարանական կառավարման ձևի երկրում իշխանափոխությունը ենթադրում է խորհրդարանական մեծամասնության փոփոխություն», – հայտարարել է Կոստանյանը «Ազատություն» ռ/կ–ին։

Նա նաև նշել է, որ վարչապետի կամ այլ պաշտոնյաների փոփոխությունը չի կարող երբեք դիտվել իշխանափոխություն։

«Իշխանություն կորցնելը քաղաքական ուժի կողմից ենթադրում է պառլամետնական մեծամասնության փոփոխություն։ Քանի պառլամետնական մեծամասնությունը չի փոխվել երկրում, խորհրդարանական տիպի երկրում իշխանափոխության մասին խոսելն անհեթեթություն է», – ասել է Կոստանյանը։–0–