Հայաստանում 432 երեխայի արգելվել է այցելել դպրոց և մանկապարտեզ. ԱՆ
ԵՐԵՎԱՆ, 11 հունվարի./Նովոստի–Արմենիա/. Հայաստանում 432 երեխայի արգելվել է այցելել դպրոց և մանկապարտեզ, ուրբաթ ճեպազրույցի ժամանակ տեղեկացրեց Առողջապահության նախարարության հիվանդությունների վերահսկման և կանխարգելման ազգային կենտրոնի գլխավոր տնօրեն Արտավազդ Վանյանը։
«Նրանցից 152–ը Երևանից են և 250–ը` մարզերից։ Հիվանդության անգամ թեթև նախանշանների դեպքում երեխաները չեն այցելում դպրոց և մանկապարտեզ։ Սա կանխարգելիչ միջոցառումներից մեկն է, որոնց օգնությամբ մենք փորձում ենք ապահովել լիարժեք դասապրոցես», – ասաց Վանյանը։
Նա նաև նշեց, որ առաջին օրերին մեծ խնդիր էր ուսումնական հաստատություններում գրանցված ջերմաստիճանը։
«Այսօր Երևանի միայն 15 դպրոցներում է գրանցվել նշված նորմից ցածր ջերմաստիճան։ Հիմնականում խնդիրները մարզերի դպրոցներում են։ Մենք ունենք թիրախային մարզեր, օրինակ, Արագածոտնի, Գեղարքունիքի մարզերը, որտեղ շատ ցուրտ է և դպրոցներում չկա կենտրոնացված ջեռուցում», – ասաց նա։
Միաժամանակ Վանյանը նշեց, որ այս խնդիրը հաջողվում է աստիճանաբար լուծել։
Ինչ վերաբերում է վիրուսի տարածվածության վիճակագրական ցուցանիշներին, ապա, նրա խոսքով, այս պահին հետազոտվել է 549 նմուշ, որից 51–ի, այսինքն 9%–ի դեպքում հայտնաբերվել է H1N1 վիրուսը։
Նա տեղեկացրեց, որ այս պահին պոլիկլինիկաներ է դիմել 1251 քաղաքացի` նախորդ տարվա նույն ժամանակահատվածում գրանցված 967–ի համեմատ։ Այժմ ստացիոնարներում բուժվում է 693 հիվանդ` 658–ի համեմատ։–0–
