ԵՐԵՎԱՆ, 1 փետրվարի. /Նովոստի–Արմենիա/. Երևանում երկուշաբթի ստորագրվել է Հայաստանի ու Վրաստանի ռազմական համագործակցության 2016թ.–ի ծրագիրը։ Փաստաթղթերի տակ ստորագրել են Հայաստանի և Վրաստանի պաշտպանության նախարարներ Սեյրան Օհանյանն ու Թինաթին Խիդաշելին։ Փաստաթղթերն ուղղված են երկրների միջև իրավապայմանագրային բազայի ամրապնդմանը։
Ինչպես հայտարարեց Օհանյանը, բանակցությունների հատուկ կետ են դարձել պլանային երկկողմ միջոցառումները, որոնք ծրագրված են 2010 թ.–ից։
«Մասնավորապես, այդ փաստաթղթերն առաջին հերթին անդրադառնում են ռազմական ծրագրավորմանը, խաղաղապահությանն ու ռազմական ուսուցմանը», – նշեց նա։
Նրա խոսքով` բանակցությունների ժամանակ քննարկվել է նաև տարածաշրջանում միջազգային անվտանգության հարցը, ինչի համատեքստում հայկական կողմը կարևորուոմ է երկխոսությունը, քաղաքական ճանապարհով խնդիրների լուծումն ու հանդուրժողականության մթնոլորտի ստեղծումը։
«Մեր բանակցությունների հիմքում ընկած է դարավոր բարեկամությունը, վաղեմի փոխհարաբերություններն ու այն ոլորտները, որոնք ապահովվում են մեր համագործակցությունը։ Ես ի նկատի ունեմ զբոսաշրջությունը, մշակութային և տնտեսական կապերը», – ասաց նա։
Օհանյանը նշեց, որ չնայած Հայաստանը ՀԱՊԿ–ի անդամ է, իսկ Վրաստանը ձգտում է դառնալ ՆԱՏՕ–ի անդամ, դա չի խանգարում երկու հարևան երկրների փոխգործակցությանը։
Վրաստանի պաշտպանության նախարարն իր հերթին կարևորեց այն խնդիրների քննարկումը, որոնք միավորում են Հայաստանին և Վրաստանին։
Նրա խոսքով` շատ լավ օրինակ է այն փաստը, որ Աֆղանստանում հայ և վրացի խաղաղապահներն աշխատում են միասին` հանուն համընդհանուր կայունության և խաղաղության։ Վրաստանին և Հայաստանին միավորող հիմնական կետը, Խիդաշելու կարծիքով, Կովկասում կայունություն ու խաղաղություն հաստատելու ձգտումն է։
«Մենք ամեն օր աշխատում ենք` հանուն մեր ժողովուրդների բարգավաճման ու խաղաղության», – ավելացրեց նա։ –0–
