ԵՐԵՎԱՆ, 11 ապրիլի. /Նովոստի Արմենիա/. «Ելք» խմբակցության պատգամավոր Մանե Թանդիլյանը հայտնել է խորհրդարանում իր գործընկերների կողմից ճայթռուկներ վառելու պատճառները:
Загружается новость ... "Лево"
Չորեքշաբթի «Առևտրի և ծառայությունների մասին» ՀՀ օրենքում և մի շարք այլ հարակից օրենքներում փոփոխություններ և լրացումներ կատարելու մասին նախագծերի փաթեթի քննարկման ժամանակ «Ելքի» պատգամավոր Արարատ Միրզոյանը կոչ արեց հայաստանցիներին մասնակցել ապրիլի 13–ին նախատեսված հանրահավաքին` ընդդեմ վարչապետի պաշտոնին ՀՀ նախկին նախագահ Սերժ Սարգսյանի առաջադրմանը, և հայկական խորհրդարանի ամբիոնում ճայթռուկ վառեց։ Ամբիոնի մոտ նրան միացավ նաև ընդդիմադիր պատգամավոր Լենա Նազարյանը, որի ձեռքում ևս վառվում էր երկու գունավոր ճայթռուկ։
«Դա հարկադրված քայլ էր, որը միտված էր քաղաքացիների ուշադրության գրավմանն ինչպես երկրում տիրող իրավիճակին, այնպես էլ առաջիկա հանրահավաքին (ապրիլի 13-ին): Ընկալեք դա որպես բողոքի ակցիա, որը, վստահ եմ, չի վնասի գործընկերներիս առողջությանը, սակայն հուսով եմ, որ կհասկանաք, որ դա հարկադրված կայլ էր` ուշադրություն գրավելու համար», - ասաց Թանդիլյանը:
Ազգային ժողովի փոխխոսնակ Էդուարդ Շարմազանովը նշեց իր հերթին, որ «ՀՀ ազգային ժողովի մասին» սահմանադրական օրենքն իրավունք է տալիս համապատասխան միջոցներ կիրառել նման ակցիաների նախաձեռնողների նկատմամբ։
«Սա ձեզ համար մսուր կամ մանկապարտեզ չէ, սա խորհրդարան է», - ասաց Շարմազանովը:
Մարտի 31-ից «Ելք» ընդդիմադիր խմբակցության ղեկավար, «Քաղաքացիական պայմանագիր» կուսակցության նախագահ Նիկոլ Փաշինյանը սկսել է բողոքի ակցիա Սերժ Սարգսյանին վարչապետի պաշտոնում հնարավոր նշանակման դեմ: Փաշինյանը սկսել է երթը Գյումրուց ու մինչև ապրիլի 13-ը մտադիր է անցնել Սպիտակ, Դիլիջան, Սևան ու Հրազդան քաղաքներով` կոչ անելով քաղաքացիներին ակտիվ մասնակցել քաղաքական գործընթացներին:
Ապրիլի 13-ից Փաշինյանն իր կողմնակիցների հետ նախատեսում է Երևանի Ազատության հրապարակում սկսել շուրջօրյա հանրահավաք, որը միտված կլինի Սերժ Սարգսյանին ՀՀ վարչապետի պաշտոնում նշանակելու դեմ:-0-
