Հայաստանի բնակիչները կարող են զմայլվել աստղային անձրևով
ԵՐԵՎԱՆ, 20 հոկտեմբերի./Նովոստի–Արմենիա/. Հայաստանի բնակիչները մի քանի գիշեր շարունակ կարող են դառնալ երկնաքարային անձրևի ականատեսը, «Նովոստի–Արմենիա» գործակալությանն ասաց Բյուրականի աստղադիտարանի տնօրեն Արեգ Միքայելյանը։
Նրա խոսքով, այս գեղեցիկ երևույթին կարելի է հետևել ուրբաթ լույս շաբաթ գիշերը։
«Երկնաքարային հոսքը կտևի մի քանի օր, սակայն ժամանակի ընթացքում նրա ինտենսիվությունը կթուլանա։ Եթե սովորական գիշերվա ընթացքում մարդը կարող է տեսնել մի քանի երկնաքար, ապա երկնաքարային հոսքի օրերին հնարավոր է տեսնել հարյուր հազարավոր երկնաքարեր», – ավելացրեց Միքայելյանը։
Նրա խոսքով, հոսքին ավելի լավ է հետևել քաղաքից հեռու, որտեղ չի խանգարի արհեստական լուսավորությունը։
«Դրանք օրիոնիդներ են, որոնք կապված են Օրիոն համաստեղության հետ, որը համարվում է հոսքի ելակետը», – ընդգծեց Միքայելյանն ու ավելացրեց, որ այս հոսքը վտանգավոր չէ, քանի որ երկնաքարերն այրվում են մինչև Երկրի մթնոլորտին հասնելը։
«Եթե քարերն ավելի մեծ են լինում, չեն հասցնում ամբողջովին այրվել և հասնում են Երկրի մակերևույթին։ Այդպես եղավ Չելյաբինսկում։ Նախնական տվյալներով` երկնաքարի չափսը մոտ 15 մետր էր։ Տիեզերքում, իհարկե, կան նման խոշոր քարեր, սակայն որքան նրանք խոշոր են, այդքան քիչ է դրանց քանակը և հակառակը»,– նշեց Միքայելյանը։
Օրիոնիդներն ամենագեղեցիկ երկնաքարային հոսքերից են, քանի որ դրանք երկնքում կարող են տարբեր գույնի հետքեր թողնել։–0–
