ԵՐԵՎԱՆ, 15 հունիսի. /Նովոստի-Արմենիա/. Հարավային Օսեթիայի խորհրդարանը առաջիկա նիստի ժամանակ կքննարկի 1915 թ.-ին Օսմանյան կայսրությունում տեղի ունեցած Հայոց ցեղասպանության ճանաչման հարցը:
«Հայ ժողովրդի ցեղասպանության ճանաչումը քննարկվել է Հարավային Օսեթիայի օրենսդիր մարմնում դեռևս անցած տարի, սակայն հայկական համայնքը պաշտոնապես դիմել է խորհրդարան երեքշաբթի», - հայտնել են չորեքշաբթի Ինտերֆաքսին խորհրդարանի մամուլի ծառայությունից:
Գործակալության զրուցակիցը նշել է, որ հարցը քննարկման կդրվի Օրենսդրության, օրինականության և տեղական ինքնակառավարման կոմիտեի ղեկավար Օլեսյա Կոչիևայի կողմից առաջիկա նստաշրջանի նիստի ժամանակ:
«Որոշ պատգամավորներ նշել են, որ Հայաստանը ևս պետք է ճանաչի օսեթների ցեղասպանությունը, սակայն դա սկզբունքային չէ: Սկզբունքայինն է այն, որ հայկական համայնքի ներկայացուցիչները հարավօսեթական հասարակության լիիրավ անդամներ են, նրանցից շատերը մարտնչել են մեր հանրապետության ազատության և անկախության համար, մեզ հետ հաղթահարել են ռազմական տարիների դժվարությունները, իսկ որոշներն էլ ցեղասպանությունից մազապուրծ եղած հայերի ժառանգներն են», - նշել են մամուլի ծառայությունից:
Խորհրդարանականների կարծիքով, եթե օրենսդիրները դրական որոշում կայացնեն, ապա «կվերականգնվի պատմական և մարդկային արդարությունը եղբայրական ժողովրդի նկատմամբ, որը Հարավային Օսեթիայի ժողովրդի պես զգացել է ցեղասպանության սարսափը»:
Իսպանական Մերիդա քաղաքը ճանաչել է Հայոց ցեղասպանությունը>>
Հայոց ցեղասպանությունը ХХ դարի առաջին ցեղասպանությունն է։ Թուրքիան ավանդաբար մերժում է Առաջին համաշխարհային պատերազմի տարիներին շուրջ մեկուկես միլիոն հայերի զանգվածային ջարդեր իրականացնելու մեղադրանքները և չափազանց ցավագին է վերաբերվում Արևմուտքի քննադատություններին։
Հայոց ցեղասպանության փաստը ճանաչել են բազմաթիվ երկրներ, մասնավորապես` Ուրուգվայը, Լիտվան, Ռուսաստանը, Ֆրանսիան, Իտալիայի խորհրդարանի ստորին պալատը, Գերմանիան, Հոլանդիան, Սլովակիան, Շվեդիան, Շվեյցարիան, ԱՄՆ 42 նահանգներ, ինչպես նաև Հունաստանի, Կիպրոսի, Արգենտինայի, Բելգիայի, Ուելսի, Լյուքսեմբուրգի խորհրդարանները, Կանադայի խորհրդարանի համայնքների պալատը և Լեհաստանի սեյմը, Պարագվայի Սենատը,Վատիկանը, Եվրախորհդարանը, Եկեղեցիների համաշխարհային խորհուրդը։ -0-
