ԵՐԵՎԱՆ, 2 փետրվարի. /Նովոստի–Արմենիա/. ՀՀ օմբուդսմենի թեկնածուն կառաջադրվի խորհրդարանի պետաիրավական հանձնաժողովի կողմից։
ՀՀ ԱԺ–ն երեքշաբթի ընդունել է ՄԻՊ–ի պաշտոնում թեկնածություն առաջադրելու և ընտրության կարգում նախատեսված համապատասխան փոփոխությունները։
Ինչպես փոփոխությունները ներկայացնելիս նշեց փոփոխությունների հեղինակ, ՀՀ ԱԺ պետաիրավական հարցերի մշտական հանձնաժողովի նախագահ Հովհաննես Սահակյանը, Սահմանադրության բարեփոխումից հետո անհրաժեշտություն առաջացավ փոփոխություններ մտցնել «Մարդու իրավունքների պաշտպանի մասին» օրենքում և այդ պաշտոնի համար թեկնածություն առաջադրելու և ընտրելու կարգում։
Փոփոխությունների համաձայն` Օմբուդսմենի թեկնածուին խորհրդարանի քննարկմանը ներկայացնելու լիազորությունները պատկանում են ՀՀ ԱԺ պետաիրավական հարցերի մշտական հանձնաժողովին։
«Կարգով նախատեսված են նաև մշտական հանձնաժողով հայտերի ներկայացման, դրանց ուսումնասիրման և թեկնածուի վերջնական առաջադրման ժամկետները։ Թեկնածուն խորհրդարանում քվեարկության ժամանակ պետք է հավաքի պատգամավորների ձայների 3/5–ը», – ասաց Սահակյանը։
ՀՀ ԱԺ–ն պաշտոնապես ընդունել է Օմբուդսմենի հրաժարականը>>
Նա նաև նշեց, որ հանձնաժողով թեկնածություններ կներկայացնեն բոլոր խմբակցությունները, սակայն խորհրդարանի քննարկմանը կներկայացվի միայն մեկ թեկնածու։
Կարգով նախատեսվում է, որ եթե հանձնաժողովի կողմից ընտրված թեկնածուն չանցնի քվեարկության ժամանակ, ապա հանձնաժողովը պետք է ներկայացնի նոր թեկնածու։
ՀՀ ԱԺ–ն պաշտոնապես ընդունել է Մարդու իրավունքների պաշտպան Կարեն Անդրեասյանի հրաժարականը։ Նոր Օմբուդսմենին կընտրեն մեկ ամսվա ընթացքում: Օմբուդսմեն Կարեն Անդրեասյանը, գործող կարգի համաձայն, 2016 թ.–ի հունվարի 13–ին և 18–ին խորհրդարան էր ներկայացրել հրաժարականի երկու դիմում։ «Մարդու իրավունքների պաշտպանի մասին» օրենքի համաձայն` Օմբուդսմենի լիազորությունները դադարեցվում են, եթե նա Ազգային ժողովին հրաժարական ներկայացնելուց ոչ ուշ, քան 10 օր հետո կրկնում է իր հրաժարականը (այսինքն երկու անգամ պետք է ներկայացնի հրաժարականը):
ՀՀ մարդու իրավունքների պաշտպան Կարեն Անդրեասյանը հրաժարականի դիմում է ներկայացրել>>
Ավելի վաղ հաղորդվել է, որ ՀՀ մարդու իրավունքների պաշտպան Կարեն Անդրեասյանը հրաժարականի դիմում է ներկայացրել։
«Պաշտպանը շնորհակալություն է հայտնում բոլոր գործընկերներին համատեղ աշխատանքի համար և հույս է հայտնում, որ մարդու իրավունքների պաշտպանությունը կշարունակի մնալ մեր պետության և հասարակության առաջնահերթությունը» , – նշվում է ՀՀ մարդու իրավունքների պաշտպանի Facebook–յան էջում։–0–
