ՀՀ նախագահը կողմնորոշվել է ոստիկանապետի հետագա ճակատագրի հարցում

ԵՐԵՎԱՆ, 25 օգոստոսի. /Նովոստի-Արմենիա/. Հայաստանի նախագահ Սերժ Սարգսյանը որոշում է կայացրել ՀՀ ոստիկանապետ Վլադիմիր Գասպարյանի ճակատագրի հարցում, գրում է «Ժողովուրդ» թերթը:

Ինչպես նշում է պարբերականը, հղում անելով ՀՀ նախագահի նստավայրին մոտ կանգնած աղբյուրներին, Սերժ Սարգսյանը ՀՀ ոստիկանապետ Վլադիմիր Գասպարյանին հասկացրել է, որ նա կշարունակի պաշտոնավարել:

«Մենք դեռ միասին պետք է ընտրություններ կազմակերպենք», - աշխատանքը շարունակելու մոտավորապես այսպիսի բովանդակությամբ ակնարկ է արել Սերժ Սարգսյանը Վլադիմիր Գասպարյանին:

«Ինչը նշանակում է, որ, մինչև 2017 թվականի ապրիլին կայանալիք խորհրդարանական ընտրությունները ՀՀ ոստիկանապետ կմնա Վլադիմիր Գասպարյանը», - գրում է թերթը:

Պարբերականը փորձել է լուրը ճշտել ՀՀ ոստիկանության հասարակայնության հետ կապի և լրատվության վարչության պետ Աշոտ Ահարոնյանից, սակայն նա հրաժարվել է որևէ կերպ մեկնաբանել տեղեկությունը: Իսկ Սերժ Սարգսյանի մամուլի քարտուղարի հետ կապ հաստատել չի հաջողվել: -0-