ՀՀ կառավարությունը ժամանակավորապես կկասեցնի սոցփաթեթի շրջանակում պետծառայողների հանգստի ծախսերի վճարումը

ԵՐԵՎԱՆ, 7 հուլիսի. /ԱՌԿԱ/. Հայաստանի կառավարությունը ժամանակավորապես կասեցնում է սոցիալական փաթեթի շրջանակում պետծառայողների հանգստի կազմակերպման ծախսերի վճարումը, հինգշաբթի կառավարության նիստի ժամանակ ասել է ՀՀ վարչապետ Հովիկ Աբրահամյանը:

Այդ որոշումը կայացվել է կառավարության կողմից հաստատված ՀՀ 2017-2019թթ. պետական միջնաժամկետ ծախսերի ծրագրի շրջանակում, որի հիմնական նպատակը պետական ծախսերի կառավարման համակարգի արդյունավետության բարձրացումն է:

Հովիկ Աբրահամյանը անդրադարձել է սոցիալական փաթեթների հանգստի ոլորտում չարաշահումներին և հանձնարարել պատասխանատու գերատեսչությունների ղեկավարներին լրամշակել սոցիալական փաթեթների հանգստի բաղադրիչը՝ նվազագույնի հասցնելով բոլոր հնարավոր չարաշահումները, և ներկայացնել կառավարության քննարկմանը, իսկ մինչ այդ ժամանակավորապես միայն հանգստի բաղադրիչը կասեցնել:

«Ուզում եմ ուշադրություն դարձնել, որ շարունակվում են չարաշահումները` կապված պետական ծառայողներին հանգստի կազմակերպման սոցփաթեթի տրամադրման բաղադրիչի հետ», – նշել է Աբրահամյանը, հաղորդում է «ԱՌԿԱ» գործակալությունը։ 

Կառավարության ղեկավարն ընդգծել է, որ նրա հանձնարարականով` վարչապետի վերահսկիչ ծառայությունը ստուգումներ է իրականացրել, և այս պահին այդ հարցով զբաղվում է Հայաստանի Վերահսկիչ պալատը։

Վարչապետի խոսքով, հաշվի առնելով այս խնդիրը` Ֆինանսների նախարարությունն առաջարկել է արմատական որոշում` սոցփաթեթներում միայն թողնել բժշկական բաղադրիչի ֆինանսավորումը։

«Կարծում եմ, որ չարժե ամբողջությամբ դադարեցնել ֆինանսավորումը, բավական է ժամանակավորապես դադարեցնել միայն հանգստի կազմակերպման բաղադրիչը` կրճատելով միայն այդ ծախսերը», – ասել է  Աբրահամյանը։

Միաժամանակ վարչապետը հանձնարարել է էկոնոմիկայի, սոցիալական հարցերի և ֆինանսների նախարարներին լրամշակել սոցփաթեթների շրջանակում հանգստի կազմակերպման բաղադրիչը` հնարավոր բոլոր չարաշահումները նվազեցնելու նպատակով, և առաջարկների փաթեթը ներկայացնել կառավարության քննարկմանը։

Ինչպես լրագրողներին պարզաբանեց ՀՀ աշխատանքի և սոցիալական հարցերի նախարար Արտեմ Ասատրյանը, որոշումն ընդունվում է 2017–2019 թթ.–ի ծախսերի միջնաժամկետ ծրագրի գործողության ժամանակահատվածում, սակայն, վարչապետի հանձնարարությամբ, իրականացվում են ուսումնասիրություններ, որոնք նախատեսվում է ավարտել մեկ ամսվա ընթացքում։

«Ելնելով ուսումնասիրության արդյունքներից` 2017 թ.–ի պետբյուջեն քննարկելիս հարցը կդիտարկվի ավելի մանրամասն։ Սակայն 2016 թ.–ի վրա այս որոշումը դեռևս չի տարածվում», – ասել է Ասատրյանը։

Նա նշել է, որ ըստ պետբյուջեի` սոցփաթեթներին նախատեսվում է մոտ 10 մլրդ դրամ, համակարգի շահառուներն են մոտ 100 հազար պետական ծառայողներ։

Տարեկան 132 հազար դրամի սոցփաթեթը տրամադրվում է պետական ծառայողներին և նախատեսում է մի քանի պարտադիր բաղադրիչներ` առողջապահական ծախսերի մարում, հիփոթեքային տոկոսների մարում, բուհերում ուսման վարձի վճարում և հանգստի կազմակերպում Հայաստանի հանգստյան տներում ($1 – 476,93 դրամ)։ -0-