ԵՐԵՎԱՆ, 8 սեպտեմբերի. /Նովոստի–Արմենիա/. ՀՀ գլխավոր դատախազությունը Վերաքննիչ դատարանում բողոքարկել է ՌԴ քաղաքացի Սերգեյ Միրոնովին ազատ արձակելու մասին Երևանի Կենտրոն և Նորք Մարաշ վարչական շրջանների ընդհանուր իրավասության դատարանի որոշումը, հաղորդում է
pastinfo–ն։
Երևանի Կենտրոն և Նորք Մարաշ վարչական շրջանների ընդհանուր իրավասության դատարանը օգոստոսի 29-ին մերժել է ՌԴ քաղաքացի Սերգեյ Միրոնովին կալանավորելու վերաբերյալ գլխավոր դատախազության միջնորդությունը:
Հայկական դատարանն ազատ արձակեց ՌԴ ձերբակալված քաղաքացուն (ՏԵՍԱՆՅՈՒԹ)>>
Մի քանի օր անց Միրոնովը մեկնել է Ռուսաստան։
Հայաստանի ոստիկանության տվյալներով, օգոստոսի 26-ին ժամը 16.30-ին ոստիկանության քրեական հետախուզության գլխավոր վարչության և «Զվարթնոց» օդանավակայանի գծային բաժնի ծառայողների կողմից «Զվարթնոց» օդանավակայանում հայտնաբերվել և ՔՀԳՎ բերման է ենթարկվել ՌԴ քաղաքացի, 1986 թ. ծնված Սերգեյ Միրոնովը, որը 2016 թ. մայիսի 11-ից միջազգային մակարդակով հետախուզվում է ԱՄՆ իրավապահ մարմինների կողմից։ Սերգեյ Միրոնովին կասկածում էին «Գենեզիս» ընկերության միջոցով զենքի առևտրի մեջ։ Հիշեցնենք, որ նա այդ ընկերությունում աշխատում է որպես ծրագրավորող և ցանցային ադմինիստրատոր։
Միրոնով. Հայաստանում ինձ հետ վերաբերվում էին հյուրի պես>>
Միրոնովի փաստաբանի խոսքով` Միրոնովը հասարակ ծրագրավորող է, և նրան հասանելի չեն գաղտնի տեխնոլոգիաները։ –0–
