ԵՐԵՎԱՆ, 13 ապրիլի. /Նովոստի-Արմենիա/. ՀՀ ազգային անվտանգության ծառայության քննչական վարչությունում հարուցվել է քրեական գործ, որի հիմք է հանդիսացել ՀՀ ֆինանսների նախարար Գագիկ Խաչատրյանի և նրա մերձավորների վերաբերյալ լսանյութը, գրում է «Հայկական ժամանակը»:
«Այդ լսանյութը համացանցում էր հայտնվել այս տարվա մարտի 30-ին և մեծ արձագանք էր գտել հանրության շրջանում: Դա, ըստ էության, անանուն բաց նամակ էր, որում «ՀՀ մաքսային ծառայության մի խումբ աշխատակիցների» անունից ներկայացվում էին մաքսային ծառայությունում տարիներ շարունակ գործող կոռուպցիոն սխեմաները: Նամակում տրվում էին կոնկրետ անուններ, որոնց թվում էին Գագիկ Խաչատրյանը և նրա եղբորորդին` Կարեն Խաչատրյանը, որը ՀՀ պետեկամուտների կոմիտեի ներքին անվտանգության ստորաբաժանման ղեկավարն է», նշվում է հոդվածում:
Ու՞ր է կորել ՀՀ ֆինանսների նախարարը, կամ խորհրդավոր «աուդիոնամակի» հետքերով>>
Ըստ բաց նամակի հեղինակների` կոռուպցիոն սխեմաների շնորհիվ «յուրաքանչյուր ամիս գրպանվել են տասնյակ միլիոնավոր դոլարների հասնող գումարներ, որոնք, ըստ էության, պետք է մուտքագրվեին պետբյուջե»:
«Երեկ մեզ չհաջողվեց պարզել, թե ՔՕ որ հոդվածով է հարուցվել գործը` ԱԱԾ-ն քննում է բերված փաստե՞րը, թե փորձում է գտնել «բաց նամակի» հեղինակներին», - նշում է թերթը։
Թերթը նաև գրում է, որ ձայնագրությունը կարճ ժամանակ անց անհետացավ համացանցից: -0-
