ՀՀ ՍԴ նախագահ է ընտրվել Հրայր Թովմասյանը

ԵՐԵՎԱՆ, 21 մարտի. /Նովոստի Արմենիա/. Հրայր Թովմասյանը պատգամավորների կողմից ընտրվեց ՀՀ Սահմանադրական դատարանի նոր նախագահ:

Քվեարկությանը, ընդհանուր առմամբ, մասնակցեց 93 պատմագավոր. 64 պատգամավոր քվեարկեց «կողմ», 27–ը` «դեմ», երկու քվեաթերթիկ ճանաչվեց անվավեր:

Ազգային ժողովի նախագահ Արա Բաբլոյանը մարտի 12-ին հանդես է եկել հայտարարությամբ` Հրայր Թովմասյանի թեկնածությունն առաջադրելով ՍԴ նախագահի պաշտոնում։ Նշենք, որ Թովմասյանը միակ թեկնածուն էր այս պաշտոնում:

Չորեքշաբթի կայացած ԱԺ նիստում Թովմասյանը շնորհակալություն հայտնեց վստահության համար։

«Նման բարձր պաշտոնի առաջադրումն ինչ համար ոչ միայն մեծ պատիվ է այլև մեծ պատասխանատվություն, և ես կփորձեմ առավելագույն ջանք գործադրել ոլորտում առկա խնդիրները լուծելու համար, ինչը հնարավորություն կտա ձևավորել ավելի բարեկեցիկ ու հզոր երկիր», - ասաց Թովմասյանը:

Նա նաև կարևորեց ՍԴ-ի միջազգային կապերի ընդլայնումը, նիստերի ուղիղ հեռարձակման հնարավորությունը:

ԱԺ պատգամավոր Հրայր Թովմասյանը մարտի 2–ին ընտրվել է ՍԴ–ի նոր անդամ։ Թովմասյանի թեկնածությունն առաջադրվել է ՍԴ–ի անդամի պաշտոնին, քանի որ ՍԴ նախագահ Գագիկ Հարությունյանը մարտի 23–ին դառնում է 70 տարեկան, ինչից հետո նա իրավունք չի ունենա զբաղեցնել այդ պաշտոնը։

ՀՀ Սահմանադրության համաձայն, Սահմանադրական դատարանի դատավորներին ընտրում է ԱԺ–ն 12 տարի ժամկետով։ ՍԴ–ն բաղկացած է 9 դատավորից, որոնցից երեքն ընտրվում են ՀՀ նախագահի, երեքը` կառավարության, երեքը` Դատավորների ընդհանուր ժողովի առաջարկով։ Դատավարնորը ստանձնում են իրենց պաշտոնը մինչև 70 տարեկան։

Սահմանադրական դատարանը ՍԴ նախագահին և փոխնախագահին ընտրում է իր կազմից 6 տարի ժամկետով առանց վերընտրվելու իրավունքի։-0-