Երևանը ժամանակավոր ապաստան է տվել Ադրբեջանի թալիշական համայնքի ներկայացուցչին
ԵՐԵՎԱՆ, 12 փետրվարի. /Նովոստի-Արմենիա/. Հայաստանի իշխանությունները ժամանակավոր ապաստան են տվել Ադրբեջանի թալիշական համայնքի ներկայացուցիչ Շահին Միրզոևին, ով ստիպված է եղել փախչել Ադրբեջանից, Facebook-յան իր էջում հայտնել է ՀՀ ԱԳՆ մամուլի քարտուղար Տիգրան Բալայանը:
«Հայաստանի իշխանություններին է դիմել Շահին Միրզոևը՝ խնդրելով իրեն տրամադրել ժամանակավոր ապաստան, քանի որ, հանդիսանալով Թալիշական մշակույթի խորհրդի անդամ, Թալիշական ազատագրական շարժման մասնակից, «Թոլիշի Սադո» թերթի թղթակից, ստիպված է եղել փախչել Ադրբեջանից՝ ազգային և կրոնական փոքրամասնությունների հանդեպ բռնաճնշումների ու նրանց իրավունքների կոպտագույն ոտնահարումների պատճառով, և ընտանիքով ժամանել Հայաստան», - նշել է Բալայանը։
Նրա խոսքով, Հայաստանի իշխանությունները դրական են արձագանքել Շահին Միրզոևի խնդրանքին։
Թալիշցիները իրանական լեզվախմբին պատկանող ժողովուրդ են: Բնակվում են Կասպից ծովի հարավարևմտյան ափին, Ադրբեջանի հարավ-արևելքում և Պարսկաստանի հյուսիս-արևուտքում: -0-
