Երևանում ոստիկանության շենքը զավթած զինված խմբավորումը պատրաստ է մինչև երեկո պատասխանել ԱԱԾ-ի պահանջներին

19.07.2016, 14:11
Երևանի ՊՊԾ գնդի շենքը գրաված զինված խմբավորման անդամները պատրաստ են մինչև 19:00-ը պատասխանել ԱԱԾ-ի պահանջներին:
Երևանում ոստիկանության շենքը զավթած զինված խմբավորումը պատրաստ է մինչև երեկո պատասխանել ԱԱԾ-ի պահանջներին
ԵՐԵՎԱՆ, 19 հուլիսի. /Նովոստի-Արմենիա/. Երևանի ՊՊԾ գնդի շենքը գրաված զինված խմբավորման անդամները պատրաստ են մինչև 19:00-ը պատասխանել ԱԱԾ-ի պահանջներին, երեքշաբթի լրագրողներին ասաց «Հիմնադիր խորհրդարան» արմատական ընդդիմադիր կազմակերպության անդամ Ալեք Ենիգոմշյանը:

Կիրակի լուսադեմին մի խումբ զինված անձինք մուտք են գործել ՀՀ ոստիկանության պարեկապահակային ծառայության գնդի տարածք և բռնության սպառնալիքով պահում են այնտեղ գտնվող անձանց, որոնց թվում են` ՀՀ փոխոստիկանապետ Վարդան Եղիազարյանն ու Երևանի փոխոստիկանապետ Վալերի Օսիպյանը, ովքեր գնացել են այնտեղ բանակցություններ վարելու համար։ Հարձակման ժամանակ զոհվել է գնդապետ Արթուր Վանոյանը, տարբեր վիրավորումներով հոսպիտալացվել է 6 մարդ` 5 ոստիկան և մեկ հարձակվող։

Զինված անձինք «Հիմնադիր խորհրդարան» արմատական ընդդիմադիր կազմակերպության կալանավորված առաջնորդ Ժիրայր Սեֆիլյանի կողմնակիցներն են, ովքեր պահանջում են ազատել նրան։

«ԱԱԾ-ի և «Հիմնադիր խորհրդարանի» միջև բանակցություններն ընթանում են իմ անմիջական մասնակցությամբ: Նախօրեին ես փոխանցել եմ Էրեբունիում ոստիկանության շենքը գրաված «Սասնա ծռեր» խմբավորման անդամներին ԱԱԾ-ի պահանջները, որոնց նրանք պատրաստ են պատասխանել երեկոյան», - ասաց Ենիգոմշյանը:

Ընդ որում, նա հրաժարվեց ներկայացնել ԱԱԾ-ի կողմից առաջ քաշված հիմնական պահանջները:

Ենիգոմշյանի խոսքով, նախնական պայմանավորվածությունները ձեռք բերելուց հետո, ինչպես նաև նրանից հետո, որ խմբավորման անդամները հայտարարեցին, որ պատրաստ են քննարկել իշխանությունների կողմից առաջ քաշված առաջարկները, Ոստիկանության շենքում գտնվող բոլոր մարդիկ զրկվել են ցանցակացծ տիպի հաղորդակցություններից:

«Նման պայմաններում հնարավոր չէ բանակցություններ վարել, և եթե կես ժամվա մեջ շենքում կապը չվերականգնվի, մենք կհամարենք, որ իշխանությունները միակողմանի կարգով դադարեցնում են բանակցությունները», - ասաց Ենիգոմշյանը:

Նա նշեց, որ մինչ այժմ բանակցություններն ընթացել են նորմալ ձևաչափով, իսկ «Հիմնադիր խորհրդարանի» անդամների գործողությունները, իր միջնորդությամբ, համաձայնեցվում են Ժիրայր Սեֆիլյանի հետ:

Առավոտվա դրությամբ, գրավված ՊՊԾ գնդի շենքի մոտակայքում տիրող իրավիճակը մնում է հանգիստ, գիշերն անցել է առանց միջադեպերի: -0-