ԵՐԵՎԱՆ,18 հուլիսի. /Նովոստի-Արմենիա/. Երևանում ոստիկանության պարեկապահակային ծառայության գնդի շենքը գրաված մարդիկ հայտարարում են, որ ազատել են ևս մեկ պատանդի, հայտնում է Lragir.am-ը՝ հղում անելով զինված խմբավորման մասնակից Վարուժան Ավետիսյանին:
Նա նշել է, որ ոստիկանն ազատ է արձակվել` որպես բարի կամքի դրսևորում՝ Ժիրայր Սեֆիլյանի առաջարկով, որը կալանավորված է ապօրինի զնեք պահելու փաստով հարուցված քրեական գործի շրջանակում:
Նախօրեին հայտնի է դարձել, որ զինված անձինք պատանդ են պահում վեց ոստիկանի:
«Նովոստի-Արմենիա» գործակալությունը փորձում է մեկնաբանություններ ստանալ ոստիկանությունից:
Կիրակի լուսադեմին մի խումբ զինված անձինք մուտք են գործել ՀՀ ոստիկանության պարեկապահակային ծառայության գնդի տարածք և բռնության սպառնալիքով պահում են այնտեղ գտնվող անձանց։ Հարձակման ժամանակ մեկ ոստիկան զոհվել է, չորսը` վիրավորվել։ Որոշ տեղեկություններով` զինված անձինք «Հիմնադիր խորհրդարան» արմատական ընդդիմադիր կազմակերպության կալանավորված առաջնորդ Ժիրայր Սեֆիլյանի կողմնակիցներն են, ովքեր պահանջում են ազատել նրան։ -0-