Երևանում կայացավ Սոցիալական գործընկերության 7-րդ ազգային կոնֆերանսը

ԵՐԵՎԱՆ, 21 հոկտեմբերի. /Նովոստի-Արմենիա/. «ԱրմենՏել» ընկերության (ապրանքանիշը` Beeline) աջակցությամբ կայացավ Սոցիալական գործընկերության 7-րդ ազգային կոնֆերանսը, հաղորդում է ընկերության մամուլի ծառայությունը։

Սոցիալական գործընկերության 7-րդ ազգային կոնֆերանսը նվիրված է «Ընդլայնված հնարավորություններ երիտասարդների համար» թեմային, և հիմնական նպատակն է խթանել եռակողմ սոցիալական գործընկերությունը և սոցիալական երկխոսությունը ՀՀ–ում պետական մարմինների, աշխատողների և գործատուների միջև` կայուն աշխատաշուկայի ձևավորման համար:

Հաղորդագրության համաձայն, Սոցիալական գործընկերությանը նվիրված 7-րդ ազգային կոնֆերանսի ընթացքում ներկայացվեցին միջին մասնագիտական կրթության և ուսուցման (ՄԿՈՒ) ոլորտի վերաբերյալ տեղական և միջազգային կազմակերպությունների կողմից իրականացված հետազոտությունների ամփոփ վերլուծության արդյունքները, զարգացման հեռանկարները, կրթություն-աշխատաշուկա համագործակցության իրավիճակը, կրթության որակի բարելավման ճանապարով երիտասարդների ինտեգրման խթանումը աշխատաշուկա, ինչպես նաև «Կրթական որակի բարձրացում` աշխատաշուկայի պահանջներին համապատասխան» թեմաները:

«Beeline-ն իր կորպորոտիվ սոցիալական պատասխանատվության ներքո իրականացվող ծրագրերում առանցքային տեղ է հատկացնում երիտասարդներին և այն բոլոր նախաձեռնություններին, որոնք կօգնեն փոխել նրանց կյանքը դեպի ավելի լավը։ Վստահ եմ, որ միջազգային փորձի փոխանակման արդյունքում, ինչպես նաև կոնֆերանսի քննարկումների շնորհիվ կձևավորվի սոցիալական գործընկերության մի հարթակ, որը հիմք կհանդիսանա երիտասարդների սահուն ինտեգրմանը դեպի աշխատաշուկա։ Թույլ տվեք, շնորհավորել Հայաստանի գործատուների հանրապետական միությանը Սոցիալական գործընկերության 7-րդ ազգային կոնֆերանսի կայացման առթիվ և վստահություն հայտնել, որ այն կնպաստի նոր լուծումների մշակմանը սոցիալական գործընկերության ոլորտում», - նշել է Հայաստանում Beeline-ի գլխավոր տնօրեն Անդրեյ Պյատախինն իր ողջույնի խոսքում։

Հայաստանի գործատուների հանրապետական միության նախագահ Գագիկ Մակարյանն իր հերթին նշել է, որ Հայաստանի գործատուների հանրապետական միությունը թվով 7-րդ ազգային կոնֆերանսն է կազմակերպում սոցիալական գործընկերության բնագավառում, որը նվիրված է «Ընդլայնված հնարավորություններ երիտասարդների համար» թեմային, որտեղ իր ուրույն դերակատարությունն ունի ՀԳՀՄ անդամ Beeline-ը։

«Նախ նշեմ, որ Beeline-ը, բոլոր կոնֆերանսներում հանդես է եկել որպես աջակից և երկրորդ` նրանք մշտպես ներկայացնում են կորպորատիվ-սոցիալական պատասխանատվության լավագույն օրինակն իրենց սեփական փորձի հիման վրա», - նշել է նա:
Բացի այդ, կոնֆերանսին մասնակցում են ՀՀ օրենսդիր և գործադիր մարմինների բարձրաստիճան պաշտոնյաներ, Հայաստանում գործող դիվանագիտական կորպուսի, միջազգային և տարածաշրջանային կառույցների ավելի քան 120 ներկայացուցիչներ, սոցիալական գործընկերներ, տեղական և միջազգային կազմակերպություններից հրավիրված փորձագետներ:

Կոնֆերանսի կազմակերպիչն է Հայաստանի գործատուների հանրապետական միությունը, հովանավորներն են՝ Ֆրիդրիխ Էբերտ հիմնադրամը, Կովկասում գործատուների միությունների համագործակցության ծրագիրը և Beeline-ը։

«ԱրմենՏել» ՓԲԸ–ն (ապրանքանիշը` Beeline) 2006 թ.–ի նոյեմբերի 3–ին ներառված է «ՎիմպելԿոմ Լթդ» ընկերությունների խմբի կազմում, որը ձեռք է բերել ընկերության բաժնետոմսերի 90 տոկոսը։ 2007 թ.–ի ապրիլից «ԱրմենՏել» ընկերության բաժնետոմսերի 100 տոկոսը պատկանում է ռուսական ընկերությանը։ «ԱրմենՏելը» տրամադրում է ամրակցված (ավելի քան 650 հազար բաժանորդ) և բջջային կապի (ավելի քան 780 հազար բաժանորդ), ինչպես նաև երկրի ողջ տարածքում բարձր արագության ինտերնետի ծառայություններ։ -0-