ԵՐԵՎԱՆ, 6 հուլիսի. /Նովոստի Արմենիա/. «Ծառուկյան» դաշինքի պատգամավոր Սերգեյ Բագրատյանն ընտրական օրենսգրքի բարեփոխման հարցով խորհրդարանական հանձնաժողովի նիստում առաջարկել է չեղյալ հայտարարել ռեյտինգային համակարգն ու անցում կատարել 100 տոկոսանոց համամասնական ընտրակարգի։
«Մենք առաջարկում ենք հրաժարվել, այսպես կոչված, ռեյտինգային ընտրակարգից, որը, իրականում, զրկում է ընտրությունները քաղաքական բնույթից ու վերածում է մի ընթացակարգի, երբ ներկայացուցիչները, այդ թվում` նույն կուսակցության ներկայացուցիչները, մրցում են միմյանց հետ։ Այս համակարգի շրջանակում գոություն չունի գաղափարական պայքար, իսկ ընտրությունները վերածվում են անհասկանալի գործընթացի», – ասաց Բագրատյանը։
Նա նշեց նաև, որ «Ծառուկյան» դաշինքն առաջարկում է առաջիկա ընտրություններն անցկացնել 100% փակ համամասնական ընտրակարգով, երբ ընտրողները կքվեարկեն ամբողջ կուսակցական ընտրացուցակով։
«Դա կհամապատասխանի օրենքի ու սահմանադրության տառին։ Նման մոտեցումը թույլ կտա նաև բարձրացնել կուսակցությունների դերը երկրում, ինչպես նաև կխթանի Հայաստանի կուսակցական ու քաղաքական համակարգի ձևավորմանը», – ասաց Բագրատյանը։
Հունիսի 7–ին ՀՀ Ազգային ժողովն արտահերթ նիստում հաստատեց Նիկոլ Փաշինյանի կառավարության ներկայացրած ծրագիրը։ Առաջնահերթությունների թվում է առաջիկա տարում արտահերթ խորհրդարանական ընտրությունների անցկացումը։-0-