Աշխատանքային երկուշաբթիներից մեկի փոխարեն Հայաստանում կաշխատեն շաբաթ օրը

ԵՐԵՎԱՆ, 16 օգոստոսի. /Նովոստի–Արմենիա/.Սեպտեմբերի 17-ին նշվող Խաչվերացի տոնին հաջորդող երկուշաբթի` ննջեցյալների հիշատակի օրը ոչ աշխատանքային կլինի։ Համապատասխան որոշման նախագիծը ՀՀ կառավարությանը կներկայացվի առաջիկա նիստին։

 Որոշման նախագծի համաձայն, սեպտեմբերի 18-ի փոխարեն Հայաստանի բնակիչները կաշխատեն շաբաթ` սեպտեմբերի 23-ին։

Հանգուցյալների հիշատակի օրը կամ մեռելոցը հաջորդում է Հայ առաքելական եկեղեցու 5 տաղավար տոներին. Սուրբ Ծնունդ և Աստվածահայտնություն, Հիսուս Քրիստոսի Հարություն կամ Մեծ Զատիկ, Վարդավառ, Վերափոխումն Սուրբ Աստվածածնի և Խաչվերաց։ 

Խաչվերացը Հայ Եկեղեցու հինգ տաղավար տոներից վերջինն է: Այն Խաչին նվիրված տոներից ամենակարևորն է, որովհետև նվիրված է գերությունից խաչի վերադարձին և փառաբանության հիշատակին: Հայաստանյայց Եկեղեցում Խաչվերացը տոնում են սեպտեմբերի 11-17-ն ընկած ժամանակահատվածում հանդիպող կիրակի օրը:

ՀՀ կառավարության որոշմամբ առաջին անգամ Մեռելոցը հայտարարվել է ոչ աշխատանքային օր 2008 թ–ի հուլիսի 26-ին Առաքելական եկեղեցու առաջարկով։ -0-