Արմեն Սարգսյանը մեկնաբանել է Վազգեն Սարգսյանի հետ կոնֆլիկտի մասին լուրերը

ԵՐԵՎԱՆ, 31 հունվարի./Նովոստի–Արմենիա/. Արմեն Սարգսյանը, ում թեկնածությունը ՀՀԿ–ն առաջարկում է առաջադրել երկրի նախագահի պաշտոնում, հայտարարել է, որ 1997 թ.–ին նա կոնֆլիկտ չի ունեցել Վազգեն Սարգսյանի հետ, ով այդ պահին զբաղեցրել է ՀՀ պաշտպանության նախարարի պաշտոնը։

Ավելի վաղ հայկական ԶԼՄ–ներում տեղեկատվություն էր տարածվել, որ 1997 թ.–ին Արմեն Սարգսյանը ստիպված էր հեռանալ վարչապետի պաշտոնից այն ժամանակ պաշտպանության նախարարի պաշտոնը զբաղեցնող Վազգեն Սարգսյանի հետ կոնֆլիկտի պատճառով։

«Ես 20 տարի չեմ խոսել այդ տարիների իրադարձությունների մասին։ Սակայն հասկանում եմ, որ եթե ինձ առաջարկվել է դառնալ չորրորդ նախագահը, ապա պետք է բացեմ իմ անձնական կյանքի որոշ մանրամասները։ 1997 թ.–ին ես ստիպված էի հեռանալ վարչապետի պաշտոնից ծանր հիվանդության պատճառով, և Վազգեն Սարգսյանի հետ կոնֆլիկտ չի եղել», – հայտարարել է Սարգսյանը «Շանթ» հեռուստաալիքին տված հարցազրույցում։

«Իմ վատ առողջականի մասին առաջին անգամ ինձ հարցրեց Ֆրանսիայի ֆինանսների նախկին նախարար Ժակ դե Լարոզիերը, ով խնդրեց ինձ հետազոտվել բժշկի մոտ։ Հետազոտության արդյունքում պարզ դարձավ, որ ես լուրջ հիվանդ եմ։ Իմ հիվանդության մասին ես պատմեցի նախագահ Լևոն Տեր–Պետրոսյանին։ Նախագահը Սերժ Սարգսյանի (ով այն ժամանակ զբաղեցնում էր ներքին գործերի և ազգային անվտանգության նախարարի պաշտոնը, խմբգր.), Վազգեն Սարգսյանի և Բաբկեն Արարքցյանի (ԱԺ խոսնակ, խմբգր.) հետ միասին պնդեցին, որպեսզի ես մեկնեմ բուժման», – ասել է Սարգսյանը։

Արմեն Սարգսյանը պատմել է նաև, որ երբ 1997 թ.–ին մեկնում էր բուժման, օդանավակայանում նրան ճանապարհում էր անձամբ Վազգեն Սարգսյանը։ Արմեն Սարգսյանը նաև ավելացրել է, որ եթե բուժումը հետաձգվեր 1–2 ամսով, ապա դա կարող էր հանգեցնել անուղղելի հետևանքների։

ՀՀ նախագահ, ՀՀԿ առաջնորդ Սերժ Սարգսյանը հունվարի 19–ին ՀՀ–ում Մեծ Բրիտանիայի դեսպան Արմեն Սարգսյանին առաջարկեց դառնալ երկրի չորրորդ նախագահը։

2015 թ.–ին ընդունված սահմանադրական փոփոխություններից հետո երկիրն անցնում է խորհրդարանական իշխանավարման։ Նոր նախագահին կընտրի Ազգային ժողովը։ Նախագահն իր լիազորությունները կստանձնի 2018 թ.–ի ապրիլի 9–ին։ Նույն օրը կդադարեցվեն գործող նախագահի լիազորություները, և կառավարությունը հրաժարական կտա։ Վարչապետը կընտրվի իշխող կուսակցության կամ իշխող կոալիցիայի կողմից։–0–