ԵՐԵՎԱՆ, 29 ապրիլի./Նովոստի–Արմենիա/. ՀՀ նախագահ Արմեն Սարգսյանը BBC–ին տված հարցազրույցում մեկնաբանել է երկրում ստեղծված իրավիճակը, ինչպես նաև նշել է, թե ինչով է նա հպարտանում։
«Ինչպես տեսնում եք Երևանի փողոցներում անցկացվում են բազմամարդ ցույցեր։ Այդ ամենը տարիների ընթացքում կուտակված խնդիրների հետևանքն է, որոնք այդպես էլ չեն լուծվել։ Խոսքը կոռուպցիայի, սոցիալական անարդարության, այն ամենի մասին է, որ տաղանդավոր երիտասարդությունն ապագա չէր տեսնում Հայաստանում։ Գործոնները շատ են, ամենակարևորը դարձավ իշխանությունների և մարդկանց միջև երկխոսության բացակայությունը», – նշել է Սարգսյանը։
Նա հիշեցրել է, որ հենց նախագահը պետք է բոլորին ուղորդի այդ գործընթացների սահմանադրական կարգավորման ճանապարհով։
«Հպարտ եմ, որ հասանք հաջողությամբ։ ՀՀ նախկին նախագահ ու նախկին վարչապետ Սերժ Սարգսյանը լսեց մարդկանց կարծիքն ու հրաժարական տվեց։ Ես բարձր եմ գնահատում նրա այդ խիզախ քայլը», – նշել է Արմեն Սարգսյանը։
Նրա խոսքով, դա ապացուցում է, որ երկիրը կարող է զարգանալ ժողովրդավարության և ազատության ճանապարհով։
«Չեմ սիրում գեղեցիկ նշանաբաններ, որոնցից է «թավշյա» կամ «վարդագույն» հեղափոխությունը, ինչպես նաև չեմ ուզում բնութագրել սա հեղափոխություն է, թե ոչ։ Ինձ համար կարևոր է, որ Հայաստանն ապացուցեց, որ քաղաքացիական հասարակություն գոյություն ունի։ Մարդիկ խիզախ են և հպարտ ու արտահայտում են սեփական կարծիքը», – ընդգծել է ՀՀ նախագահ Արմեն Սարգսյանը։–0–