ԵՐԵՎԱՆ, 28 հոկտեմբերի. /Նովոստի–Արմենիա/. Երևանի կենտրոնում նախօրեին պայթեցված նախկին տպարանի մասնաշենքն իրականում պատմամշակութային արժեք չէր ներկայացնում, ուրբաթ լրագրողներին ասաց ՀՀ մշակույթի նախարար Արմեն Ամիրյանը։
«Ցավոք, շենքը ներառված չէր պատմամշակութային արժեք ունեցող հուշակոթողների շարքում և ուներ սեփականատեր, ում որոշմամբ էլ շենքը քանդվել է: Անձամբ ինձ համար ցավալի է, որ տպարանի շենքն այլևս չկա, քանի որ իմ մանկությունն անցել է այդ տարածքում», – ասաց Ամիրյանը։
Նա հրավիրեց բոլորին, ովքեր շահագրգռված են քաղաքի պատմական տեսքի պահպանման հարցում, ավելի առարկայական քննարկում կազմակերպել, հրավիրել համաժողով։
«Այո, վատ է, որ հին Երևանը վերացվել է, մեղավորներին պետք է պատժել։ Այսօր մնացել են մի քանի հին շենքեր, որոնք մենք պահպանում ենք», – ասաց Ամիրյանը։
Այս կապակցությամբ նախարարը նշեց, որ ժամանակակից Երևանը ևս հետաքրքրություն է ներկայացնում զբոսաշրջության տեսանկյունից։ «Հիասքանչ քաղաք է, շատ ջերմ։ Վերջիվերջո, քաղաքը մարդկանցով է քաղաք, այսօրվանով և ապագայի մասին մեր պատկերացումներով», – ասաց Ամիրյանը։
Միաժամանակ ՀՀ ԱԻՆ–ը հայտնում է, որ ՀՀ արտակարգ իրավիճակների նախարարի հանձնարարությամբ՝ Պետական հրդեհային և տեխնիկական անվտանգության տեսչությունն ուսումնասիրում է Երևանի Հանրապետության փողոցի թիվ 65 շենքի Բ մասնաճյուղում (նախկին առաջին տպարան) իրականացված պայթեցման աշխատանքների արդյունքներն ու հետևանքները։ Ուսումնասիրության եզրակացության վերաբերյալ կտրվի լրացուցիչ տեղեկատվություն:
Նախկին առաջին տպարանի մասնաշենքի ապամոնտաժումն իրականացվել է նախօրեին «ՆորՏեխ Շին» ընկերության կողմից։ Այս փաստն իսկական իրարանցում է առաջացրել քաղաքացի բնակիչների և սոցցանցի օգտատերերի շրջանում։ Աղբյուրները հայտնում են, որ շենքը կառուցվել է նախորդ դարի 20–ական թվականներին ճարտարապետ Ալեքսանդր Թամանյանի նախագծով։ –0–
Ծանոթացեք լուրերին առաջինն ու քննարկեք դրանք մեր Telegram-յան ալիքում
