ԵՐԵՎԱՆ, 30 հոկտեմբերի. /Նովոստի-Արմենիա/. Առաջիկա օրերին հանրապետության տարածքը գտնվելու է հզոր ցիկլոնի ազդեցության գոտում, իսկ օդի ջերմաստիճանը կնվազի 5-7 աստիճանով, հայտնում է «Հիդրոմետ» ծառայության օդերևութաբանական կենտրոնի պետի տեղակալ Գագիկ Սուրենյանը:
Նոյեմբերի 1-ից օդերևութաբանը հորդորում է մարզեր երթևեկել ձմեռային անվադողերով:
Հոկտեմբերի 31-ին և նոյեմբերի 1-2-ին հանրապետության տարածքը գտնվելու է հզոր ցիկլոնի ազդեցության գոտում: Օդի ջերմաստիճանը, պայմանավորված արկտիկական ցուրտ օդային զանգվածների ներթափանցման հետ, նոյեմբերի 1-2-ին կնվազի 5-7 աստիճանով:
«Հատկապես նոյեմբերի 1-2-ին սպասվում են առատ տեղումներ, լեռնային և նախալեռնային գոտիներում՝ հիմնականում ձյան տեսքով, առանձին ճանապարհահատվածներում սպասվում է բուք, ցածր հորիզոնական տեսանելիություն և մերկասառույց», - գրել է Սուրենյանը Facebook-յան իր էջում:
Ցիկլոնի հիմնական հարվածը կլինի Արագածոտնի, Կոտայքի և Վայոց Ձորի մարզերի վրա, որտեղ սպասվող տեղումները կլինեն առավել ինտենսիվ:
«Նոյեմբերի 1-ին արկտիկական օդի ներհոսքը այնքան ուժեղ է, որ այդ օրը գիշերը ավելի տաք է լինելու, քան ցերեկը: Երևանում գիշերը կլինի +8, ցերեկը +4...+5», - գրել է Սուրենյանը:
Նոյեմբերի 3-ից տեղումները կդադարեն: -0-
