Անահիտ Բախշյանն իր անձնական ավտոմեքենան նվիրաբերել է զինհաշմանդամներին աջակցող ՀԿ-ին

ԵՐԵՎԱՆ, 3 նոյեմբերի. /Նովոստի–Արմենիա/. Կրթության փորձագետ, Երևանի ավագանու անդամ Անահիտ Բախշյանն օրերս իր անձնական ավտոմեքենան նվիրաբերել է «Աջակցություն վիրավոր զինվորներին և զինվորական հաշմանդամներին» հասարակական կազմակերպությանը, գրում է «Հայկական ժամանակը»։

«Ես այդ մեքենան ոչ վաճառող եմ, ոչ էլ վարողը, թող ծառայի զինվորներին»,-ասել է նա՝ զանգահարելով հ/կ-ի նախագահ Հայկուհի Մինասյանին։

«Վերջինս զինծառայողների համար ստեղծվող վերականգնողական կենտրոնի նախաձեռնողներից ու ակտիվ մասնակիցներից է։ Ժամանակակից սարքավորումներով հագեցած կենտրոնը կգործի Երևանի պետական բժշկական համալսարանի շինություններից մեկ բազայի վրա, բացումը նախատեսված հունվարի 28-ին», – նշում են հոդվածի հեղինակները։

«Անահիտ Բախշյանը տեսնում էր, որ զինվորներին բերում-տանում են տաքսիներով, ասաց՝ մի ավտոմեքենա ունեմ, որն, ինձ թվում է՝ զինվորներին ավելի պետք կլինի»,-պատմել է Հայկուհի Մինասյանը, գրում է թերթը։ –0–