ԱՄՆ–ն բարձր է գնահատում Հայաստանի մասնակցությունը հակաահաբեկչական գործողություններում. Պետդեպի ներկայացուցիչ

ԵՐԵՎԱՆ, 18 նոյեմբերի. /Նովոստի–Արմենիա/. ԱՄՆ–ն բարձր է գնահատում Հայաստանի մասնակցությունը հակաահաբեկչական գործողություններում, չորեքշաբթի Երևանում ճեպազրույցի ժամանակ հայտարարեց ԱՄՆ պետքարտուղարի եվրոպական և եվրասիական հարցերով փոխտեղակալ Բրիջիթ ‪‎Բրինքը:

«Մենք նաև բարձր ենք գնահատում Հայաստանի դերակատարությունը խաղաղարար գործողություններում`  ՆԱՏՕ–ի և ՄԱԿ–ի ուժերի կազմում», – ասաց Բրինքը։

Նա ընդգծեց, որ «Իսլամական պետություն» խմբավորման դեմ իրականացվող պայքարը համընդհանուր խնդիր է, որի շուրջ պետք է համախմբվի ողջ աշխարհը։

Հայկական խաղաղապահ ուժերը 2014 թ.–ի նոյեմբերից մասնակցում են Լիբանանում անցկացվող ՄԱԿ–ի խաղաղարար առաքելությանը (UNIFIL)` իտալական համակազմի կազմում։

Հայ զինծառայողները ՆԱՏՕ–ի առաքելության շրջանակում մասնակցում են նաև Կոսովոյում և Աֆղանստանում խաղաղության ապահովման գործողություններին։–0–