ԵՐԵՎԱՆ, 23 հունվարի. /Նովոստի–Արմենիա/. Ազգային ժողովը քննարկում է գների աճը, պատգամավորներն անցել են լսումների։
Ինչպես լսումների ժամանակ նշեց ԱԺ խոսնակ Արա Բաբլոյանը, լսումները կազմակերպվել են մի շարք ապրանքների գների աճի պատճառով, ինչն ակտիվորեն քննարկվում է հասարակության շրջանում։
«Կար մտահոգություն, որին խորհրդարանը, մեղմ ասած, չէր կարող չարձագանքել։ Միաժամանակ հուսով եմ, որ բոլոր հայտարարություններն ու դիրքորոշումները կլինեն առավելագույնս հիմնավորված, ինչը կօգնի հասկանալ իրավիճակն ու տրամադրել խորհրդատվություն հնարավոր լուծումները փնտրելու համար», – ասաց Բաբլոյանը։
ՀՀ ԱԺ տնտեսական հարցերի մշտական հանձնաժողովի նախագահ Խոսրով Հարությունյանն իր հերթին հույս հայտնեց, որ քննարկումների արդյունքում կհաջողվի ձևավորել վերլուծական, մասնագիտական հարթակ։
«Հույս ունեմ, որ այսօր ներկայացված մասնագիտական վերլուծությունն ու դիրքորոշումները թույլ կտան ձևավորել ընդհանուր կարծիք և առաջարկներ, որոնք օգտակար կլինեն ինչպես մասնագիտական շրջանակների, այնպես էլ քաղաքական որոշումների ընդունման համար», – ասաց Հարությունյանը։
Նիստը միանգամից սկսվեց բանավեճով, քանի որ «Ելք» ընդդիմադիր խմբակցության ղեկավար Նիկոլ Փաշինյանը չհամաձայնվեց կանոնակարգի հետ, ըստ որի` անհնար է հարցեր տալ ՀՀ ԱՎԾ ղեկավար Ստեփան Մնացականյանին, ինչին ի պատասխան` Հարությունյանն առաջարկեց քննարկել նիստի վերջում Մնացականյանին հարցեր տալու հնարավորությունը, եթե դրան ժամանակ մնա։
«Մենք չենք հավաքվել աչքերին թոզ փչելու համար, և գերատեսչությունների բոլոր ղեկավարները կպատասխանեն բոլոր հարցերին, ինչի համար էլ կազմակերպվել են լսումները», – ասաց ԱԺ փոխխոսնակ Էդուարդ Շարմազանովը։
Երկրում գների աճի հարցով իրենց դիրքորոշումներն են ներկայացնում փոխվարչապետ Վաչե Գաբրիելյանը, ԿԲ նախագահ Արթուր Ջավադյանը, ՊԵԿ փոխնախագահը, Տնտեսական մրցակցության պաշտպանության պետական կոմիտեի ղեկավար Արտակ Շաբոյանը, գյուղատնտեսության նախարարը, տրանսպորտի, կապի և տեղեկատվական տեխնոլոգիաների փոխնախարարը։
Սպառողական գները 2017 թ.–ի դեկտեմբերին, 2016 թ.–ի դեկտեմբերի համեմատ (12 ամսվա գնաճ), ավելացել են 2,6 տոկոսով, պարենային ապրանքներինը (այդ թվում` ալկոհոլն ու ծխախոտը)`5,3 տոկոսով, ոչ պարենային ապրանքներինը` 1,7 տոկոսով, իսկ սակագների և ծառայությունների գները նվազել են 0,5 տոկոսով։ Ըստ պետյբուջեի` Հայաստանում 12 ասմվա գնաճը 2017 թ.–ին նախատեսված է 4 տոկոսի սահմանում (±1,5%)։–0–
