ԱԻՆ–ը թարմ տվյալներ է ներկայացնում «Նաիրիտի» հրդեհի վերաբերյալ

ԵՐԵՎԱՆ, 28 օգոստոսի. /Նովոստի–Արմենիա/. ՀՀ արտակարգ իրավիճակների նախարարությունը թարմ տվյալներ է ներկայացնում «Նաիրիտ» գործարանում այսօր բռնկված հրդեհի մասին։

Օգոստոսի 28-ին ժամը 13:10-ին ահազանգ է ստացվել, որ Երևան քաղաքի «Նաիրիտ» գործարանի տարածքում պայթյունի ձայն է լսվել և հրդեհ է բռնկվել:Հրդեհի բարդության «թիվ 3» կանչով դեպքի վայր են մեկնել տասներկու մարտական հաշվարկ և Ճգնաժամային կառավարման ազգային կենտրոնի արտակարգ իրավիճակների արձագանքման և օպերատիվ խմբերը: Ժամը 14:00-ի սահմաններում հրդեհը մեկուսացվել է, կրակի տարածման վտանգ չկա, և բնակչությանը որևէ վտանգ չի սպառնում։


«Պարզվել է, որ «Նաիրիտ 1»-ի տարածքում՝ 4 երկաթբետոնյա տարրայում (յուրաքանչյուրը՝ մոտ 100 խմ) այրվում է էթինոլ (լաք) տեսակի քիմիական նյութ՝ ընդհանուր մոտ 200 խմ: Հրդեհաշիջմանը մասնակցում են 109 փրկարար ծառայող», – նշվում է ԱԻՆ հաղորդագրության մեջ։

Ինչպես Facebook–յան իր էջում տեղեկացնում է «Ելք» խմբակցության ղեկավար Նիկոլ Փաշինյանը, ով գտնվում է դեպքի վայրում, տարբեր փորձագետների գնահատմամբ` հրդեհի մարման աշխատանքները տևելու են մի քանի օր, քանի որ սկզբում ռեզերվուարները պետք է սառեցվեն, ինչից հետո կհաջողվի մարել կրակը։ –0–