ԵՐԵՎԱՆ, 20 փետրվարի. /Նովոստի–Արմենիա/. Երևանի Վրացական փողոցի շենքերից մեկում պայթյունի պատճառը, խիստ նախնական տվյալներով, գազի արտահոսքն է։ Այս մասին «Նովոստի–Արմենիա» գործակալությանը տեղեկացրեց ԱԻՆ մամուլի քարտուղար Նանա Գնդոյանը։
Այսօր լուսադեմին հզոր պայթյուն է տեղի ունեցել Վրացական փողոցի 10 շենքի 4-րդ մուտքի բնակարաններից մեկում, ինչի հետևանքով փլուզվել են բնակարանի միջնապատերը և պատշգամբը՝ ամբողջությամբ, վնասվել են 2-րդ, 3-րդ և 4-րդ հարկերի պատուհանները: Միջադեպի մասին ահազանգը ստացվել է երեքշաբթի առավոտյան ժամը 05։11–ին։ Պայթյունի հետևանքով փլուզվել են բնակարանի պատշգամբն՝ ամբողջությամբ (մոտ 12 քմ), ամբողջությամբ վնասվել են միջնապատերը, մեկ արտաքին պատ, հյուրասենյակի առաստաղը, թեքվել է մեկ հենասյուն, պոկվել մուտքի դուռը և ամբողջությամբ վնասվել պատուհանները:
«Սրանք խիստ նախնական տվյալներ են, որոնք կարող են փոխվել։ Հիմա ես միայն կարող եմ ասել, որ այն շենքից, որտեղ տեղի է ունեցել պայթյունը, տարհանվել է 14 մարդ», – տեղեկացրեց Գնդոյանը։
ԱԻՆ–ի տվյալներով, պայթյունի հետևանքով վնասվել է առաջին հարկում գտնվող թիվ 43 բնակարանի մուտքի դուռը, միջնապատերին առաջացել են ճաքեր՝ մոտ 2 քմ, 2-րդ հարկում գտնվող թիվ 45 բնակարանի պատուհանները և մուտքի դուռը, թիվ 46 բնակարանի միջնապատերը՝ մասամբ, վնասվել՝ հյուրասենյակի առաստաղը, թիվ 47 բնակարանի հատակը՝ մոտ 0,5 քմ: Ամբողջությամբ վնասվել են 4-րդ հարկում գտնվող թիվ 51, 52, 53 բնակարանների պատուհանները:
Վնասվել են շենքի մոտակայքում կայանած «BMW» մակնիշի, «Mercedes Vito» մակնիշի, «Volkswagen Vento» մակնիշի, «Volvo 740», «Nissan Juke», «Kia», «Mercedes C», «Toyota Corolla», «Mercedes ML», «Toyota», «Hyundai Solaris» մակնիշի ավտոմեքենաները:
Ինչպես տեղեկացավ «Նովոստի–Արմենիա» գործակալությունը, պայթյունի հետևանքով վնասվել է նաև մոտակայքում գտնվող շենքը, որոշ բնակարաններում կոտրվել են պատուհանի ապակիները։–0–
