ԵՐԵՎԱՆ, 9 փետրվարի./Նովոստի-Արմենիա/. Հայաստանում այս պահին առկա է սուր շնչառական վարակների և գրիպով պայմանավորված հիվանդությունների կտրուկ աճ:
Այս մասին այսօր կայացած ասուլիսի ժամանակա ասաց ՀՀ ԱՆ Հիվանդությունների վերահսկման և կանխարգելման ազգային կենտրոնի վարակիչ և ոչ վարակիչ հիվանդությունների համաճարակաբանության վարչության պետ Ռոմելլա Աբովյանը:
Նրա խոսքով՝ ակտիվությունը նկատվում է և՛ շտապօգնության կանչերի միջոցով, և՛ պոլիկլինիկաներ դիմելիության:
Загружается новость ... "Лево"
«Այս պահին 456 հիվանդ է բուժում ստանում, դրանցից 84.8 %-ը 0-18 տարեկան են: Թոքաբորբով հիվանդ են 318-ը, որից 57-ը՝ 0-18 տարեկաներն են: Հիմա սուր շնչառական վարակները տարածվում են 0-14 տարեկանների և 30-64 տարեկանների շրջանում»,- ասաց ԱՆ ներկայացուցիչը:
Աբովյանի խոսքով՝ Հայաստանում գործադրվում է սուր շնչառական վարակների հսկողության համակարգ, որը թույլ է տալիս բացահայտել՝ գրիպի որ տեսակն է այժմ շրջանառվում:
«Այս սեզոնի ընթացքում իրականացվել է գրիպանման և ծանր շնչառական վարակների 1089 հետազոտություն, որից 207-ի, այսինքն՝ 20%-ի դեպքում, հայտնաբերվել է Ա տեսակի H3 ենթատեսակը: Այս տեսակն ավելի շատ է տարածվում ու թիրախավորում երեխաներին»,- ընդգծեց Աբովյանը:
Նրա դիտարկմամբ՝ սուր շնչառական վարակների դեպքում ևս ախտանշաններ ջերմությունը, հազը, քթից արտահոսքն են:
«Այս ախտանշանները արտահայտվում են նաև կորոնավիրուսի «օմիկրոն» շտամի դեպքում», - ընդգծեց Աբովյանը՝ կարևորելով, որ քաղաքացիները դիմեն բժշկի, թեստավորվեն և ինքնաբուժմամբ չզբաղվեն:
«Այս պահի դրությամբ Հայաստանում 1563 երեխա հիվանդության պատճառով դպրոց ու նախադպրոցական հաստատություն չի հաճախում: Բացակայությունները պայմանավորված են ինչպես կորոնավիրուսային վարակով, այնպես էլ գրիպով և սուր շնչառական վարակներով»,-ասաց Աբովյանը:
Ինչպես նշեց փորձագետը, Երևանում հիվանդության պատճառով բացակայողների թիվը հասել է շուրջ 1098-ի: Շատ դպրոցներ աշակերտների 10 %-ի բացակայության դեպքում ստիպված են լինում անցնել հեռավար ուսուցման՝ ամբողջովին կամ մասնակի:-0-
