Հայտնի են դարձել 2015 թվականի ամենատարածված անունները

ԵՐԵՎԱՆ, 5 փետրվարի. /Նովոստի–Արմենիա/. Նարեն ու Դավիթը 2015 թ.–ի նորածինների ամենատարածված անուններն են, հաղորդում է ՀՀ ազգային վիճակագրական ծառայությունը։

«Աղջիկների շրջանում ամենատարածված անունների հնգյակում են Նարեն (այսպես են անվանակոչվել 757 նորածիններ), Մարին (638), Մանեն (592), Մարիան (574) և Միլենան (525)։ Տղաների շրջանում ամենատարածված հինգ անուններն են Դավիթը (1569), Նարեկը (1171), Ալեքսը (634), Տիգրանը (622) և Հայկը (596)», – նշվում է հաղորդագրության մեջ։

Աղջիկների 50 ամենատարածված անունների ցանկում են ինչպես հայկական անունները` Նարինեն, Գոհարը, Արփին, Արևիկը, Նանեն, այնպես էլ օտարերկրյա անունները` Վիկտորիան, Էմիլին, Յանան, Մոնիկան, Նատալին։

Տղաներին հաճախ անվանում են Սամվել, Արմեն, Արամ, Վահե, Գևորգ, Սուրեն, Սարգիս, Անդրանիկ, Վարդան, Հարություն, Մհեր։

Վիճակագրական ծառայության տվյալներով` 2015 թ.–ին Հայաստանում ծնվել է 19 611 աղջիկ և 22 204 տղա (2014 թ.–ին` 20 162 աղջիկ և 22 869 տղա)։ –0–