Նախորդ շաբաթվա կարևոր նորությունների հնգյակը (սեպտեմբերի 16–20)

ԵՐԵՎԱՆ, 21 սեպտեմբերի./Նովոստի–Արմենիա/. «Նովոստի–Արմենիա» գործակալությունը ներկայացնում է նախորդ շաբաթվա կարևոր նորությունների հնգյակը (սեպտեմբերի 16–20)։

• ՀՀ նախագահ Արմեն Սարգսյանը սեպտեմբերի 18–ին ստորագրեց Վալերիյ Օսիպյանին ՀՀ ոստիկանապետի պաշտոնից ազատելու հրամանագիրը։ Դրանից մեկ օր առաջ երեկոյան հայկական ԶԼՄ–ները հաղորդեցին, որ Օսիպյանը հրաժարականի դիմում է ներկայացրել սեպտեմբերի 17–ին կայացած Ազգային անվտանգության խորհրդի նիստի ավարտին։ Հրաժարականի օրն Օսիպյանը նշանակվեց նոր պաշտոնում։ Իսկ սեպտեմբերի 16–ին ԱԱԾ տնօրեն Արթուր Վանեցյանը տեղեկացրեց հրաժարականի մասին գերատեսչության Facebook–յան էջում։ Կառավարության նիստի ընթացքում ՀՀ վարչապետ Նիկոլ Փաշինյանը հայտարարեց ԱԱԾ տնօրենի և ոստիկանապետի ժամանակավոր պաշտոնակատարներ նշանակելու մասին։

• Հայաստանում կանցկացվի իր մասշտաբներով աննախադեպ ռազմական հավաք: Այս մասին հինգշաբթի կառավարության նիստում ասել է ՀՀ պաշտպանության նախարար Դավիթ Տոնոյանը: Ըստ նրա, սեպտեմբերի 24-ից հոկտեմբերից 5-ը կկազմակերպվեն ռազմավարական զորավարժություններ՝ ուսումնական հավաքի ձևաչափով պետական և տեղական ինքնակառավարման մարմինների մասնակցությամբ։ Նախարարը նշել է, որ հավաքն անցկացվում է որոշելու համար պետական կառույցների պատրաստակամությունը և ունակությունը պահեստային և տրանսպորտային միջոցների մոբիլիզացման համար պատերազմի վտանգի դեպքում:

• ՀՀ քննչական կոմիտեի Վայոց Ձորի մարզային քննչական վարչությունում կատարված անհրաժեշտ քննչական և դատավարական այլ գործողությունների արդյունքում պարզվել է ՀՀ ՊՆ զորամասի սպային ծանր մարմնական վնաս պատճառելու դեպքի հանգամանքները: Մեկ անձ ձերբակալվել է: 

• Դատարանը որոշել է կալանքի տակ թողնել ՀՀ երկրորդ նախագահ Ռոբերտ Քոչարյանին:Երևանի ընդհանուր իրավասության դատարանը երեքշաբթի հրապարակել է ՀՀ երկրորդ նախագահ Ռոբերտ Քոչարյանի փաստաբանական խմբի`Սահմանադրական դատարանի որոշման հիման վրա նրան ազատ արձակելու մասին ներկայացրած միջնորդության վերաբերյալ որոշումը: Միաժամանակ, սեպտեմբերի 20–ին դատարանը, դատավոր Աննա Դանիբեկյանի նախագահությամբ, որոշեց մերժել ՀՀ երկրորդ նախագահ Ռոբերտ Քոչարյանի խափանման միջոց կալանքը գրավով փոխելու պաշտպանների միջնորդությունը։

• Արցախի նախագահի խոսնակ Դավիթ Բաբայանը մեկնաբանել է ՀՀ պաշտպանության նախարար Դավիթ Տոնոյանի հայտարարությունը, որը վերաբերում է պատանդների փոխանակման մասին Ադրբեջանի առաջարկին։–0–