Երեքշաբթի` հունիսի 11–ի կարևոր նորությունների հնգյակը (ՎԻԴԵՈ)
08:00
12 Հունիսի 2019
ԵՐԵՎԱՆ, 12 հունիսի./Նովոստի–Արմենիա/. «Նովոստի–Արմենիա» գործակալությունը ներկայացնում է երեքշաբթի` հունիսի 11–ի կարևոր նորությունների հնգյակը։
Ռուսաստանը կենսաթոշակ կվճարի ԵՏՄ անդամ պետություններից ներգաղթած աշխատանքային միգրանտներին: Դա է նախատեսում միության կենսաթոշակային ապահովման մասին համաձայնագիրը, որը պատրաստվում է ստորագրման: Այժմ ներգաղթյալները վճարումներ են կատարում Ռուսաստանի կենսաթոշակային հիմնադրամում, սակայն կենսաթոշակ չեն ստանում:
Կադրային փոփոխություններ են տեղի ունեցել Արցախի գերատեսչություններում։ Վիտալի Բալասանյանն ազատվել է Արցախի Հանրապետության անվտանգության խորհրդի քարտուղար պաշտոնից: Համապատասխան հրամանագիրը հունիսի 11–ին ստորագրել է Արցախի նախագահ Բակո Սահակյանը: Լևոն Մնացականյանն իր հերթին ազատվել է Արցախի Արտակարգ իրավիճակների պետական ծառայության տնօրենի պաշտոնից ու նշանակվել Արցախի Հանրապետության ոստիկանության պետ։
Հատուկ կրթահամալիրի անչափահաս սանին մեղադրանք է առաջադրվել՝ նույն կրթահամալիրի 10-ամյա տղայի նկատմամբ սեքսուալ բնույթի բռնի գործողություններ կատարելու համար: Քննությամբ ձեռք բերված տվյալներով՝ հատուկ կրթահամալիրի ննջասենյակում սեքսուալ բնույթի բռնի գործողություններ են կատարվել նշված կրթահամալիրի սանի՝ 10-ամյա տղա երեխայի նկատմամբ՝ 2001թ.–ին ծնված անչափահասի կողմից, ով նույնպես հանդիսանում է հիշյալ կրթահամալիրի սան: 2001թ.–ին ծնված անչափահասին մեղադրանք է առաջադրվել սեքսուալ բնույթի բռնի գործողություններ կատարելու հատկանիշներով: Նրա նկատմամբ որպես խափանման միջոց ընտրվել է ստորագրություն չհեռանալու մասին:
Հայաստանի առողջապահության նախարար Արսեն Թորոսյանը մեկնաբանել է «Սուրբ Գրիգոր Լուսավորիչ» բժշկական կենտրոնի նախկին տնօրեն Արա Մինասյանից հրապարակային ներողություն խնդրելու վերաբերյալ դատական որոշումը։Մինասյանը որպես մեղադրյալ ներգրավվել է ԲԿ–ում կատարված ենթադրյալ չարաշահումների քրեական գործով։ Թորոսյանն անդրադարձել է այդ թեմային իր Facebook–ի ուղիղ եթերում, որտեղ մեղադրանքներ են հնչել բժշկական կենտրոնի տնօրենի հասցեին։ Դրանից հետո Մինասյանը քաղաքացիական հայց է ներկայացրել` հրապարակային հայտարարությունը հերքելու պահանջով։ «Ւրավական գործընթաց է ընթանում, որը շարունակվելու է, հետևաբար, մեկնաբանություններ անել չեմ ուզում։ Ես շեշտել եմ, որ այն ամենը, ինչ ասվել է եթերում, ուժի մեջ է, և վերջ»,– ասել է Թորոսյանը։
Համացանցում մեծ տարածում է գտել Facebook-յան օգտատերերից մեկի հրապարակած տեսանյութը, որտեղ նա թիվ 46 երթուղին սպասարկող միկրոավտոբուսի վարորդին զգուշացնում է, որպեսզի վերջինս հանգցնի ծխախոտը։ Զգուշացումը վերածվում է բանավեճի, վարորդն անգամ սպառնում է ուղևորին, որն այդ ամենը տեսանկարահանում է հեռախոսով և հրապարակում իր Facebook-յան էջում` կոչ անելով համապատասխան գերատեսչություններին լուծել հարցը։ Այս ամենին արձագանքում են Երևանի քաղաքապետարանն ու ոստիկանությունը, ինչի արդյունքում վարորդն ազատվում է աշխատանքից, իսկ երթուղայինը տեղափոխվում է հատուկ պահպանվող տարածք, որտեղ օրենքով սահմանված կարգով վարչական իրավախախտում կատարելու համար արձանագրություններ են կազմվել վարորդի նկատմամբ տրանսպորտային միջոցը վարելու ընթացքում ծխելու և առանց համապատասխան կարգի վարորդական իրավունքի վկայականի տրանսպորտային միջոցը վարելու համար։ Երթուղայինի վարորդն իր հերթին նշել է, որ վճարել է բոլոր տուգանքներն ու համապատասխան փաստաթղթերը նրա մոտ են, սակայն մեքենան նրան չեն վերադարձնում, և նա պատրաստ է պայքարել մինչև վերջ։–0–