Մխիթարյան. ոչ միայն ցանկանում ենք, այլ պետք է հաղթենք Եվրոպա լիգայում

ԵՐԵՎԱՆ, 21 մայիսի. /Նովոստի-Արմենիա/. Հայաստանի հավաքականի և «Մանչեսթեր Յունայթեդի» կիսապաշտպան Հենրիխ Մխիթարյանը հարցազրույց է «Sky Sports»-ին:

Հայ մարզիկը վստահ է, որ թիմը պետք հաղթի Եվրոպա լիգայի եզրափակչում, հայտնում է armsport.am-ը` հղում անելով մարզական կայքին:

«Մենք ոչ միայն ցանկանում ենք, այլ պետք է հաղթենք Եվրոպա լիգայում: Սա Չեմպիոնների լիգա դուրս գալու մեր շանսն է»,- ասել է Մխիթարյանը, ավելացնելով, որ «Մանչեսթեր Յունայթեդն» այն թիմը չէ, որը պետք է 3 տարի անընդմեջ խաղա Եվրոպա լիգայում:

Հայ ֆուտբոլիստը նաև նշել է, որ դա իր կյանքի կարևորագույն խաղերից մեկը կլինի և որ ինքը մտածում է միայն հաղթանակի մասին:

«Ես չեմ կարող բաց թողնել այդ հնարավորությունը: Եթե մենք հաղթենք Եվրոպա լիգայի եզրափակչում, ապա սա մեզ համար հիանալի մրցաշրջան կլինի, քանի որ արդեն 2 տիտղոս նվաճել ենք»,- ասել է Մխիթարյանը:

Մխիթարյանը նաև հավաստիացրել է, որ ինքը չի նյարդայնանա և գիտի՝ ինչպես հաղթահարել լարվածությունն ու պատրաստվել այսպիսի խաղերին, ընդգծելով, որ կարևոր է ցույց տալ, թե ինչի է թիմն ունակ:

««Այաքսի» մասնակցությամբ մի քանի խաղ եմ դիտել: Նրանք երիտասարդ թիմ և շատ լավ ֆուտբոլիստներ ունեն: Կարող եմ ասել, որ նրանք շատ ագրեսիվ են: Նրանք կխաղան այն ֆուտբոլը, որին սովոր են»,- եզրափակել է իր խոսքը հայ ֆուտբոլիստը:

«Մանչեսթեր Յունայթեդ»-«Այաքս» հանդիպումը Եվրոպա լիգայի եզրափակչում կկայանա մայիսի 24-ին Ստոկհոլմի «Ֆրենդս Արենա» մարզադաշտում: -0-