ԵՐԵՎԱՆ, 11 օգոստոսի. /Նովոստի–Արմենիա/. Հայ գրոսմայստեր Լևոն Արոնյանը Սինքֆիլդի գավաթի յոթերորդ տուրում ամերիկացի Հիկարու Նակամուրայի նկատմամբ տարած հաղթանակից հետո հարցազրույց է տվել chess.com–ին։
Հարցազրույցում Արոնյանը պատմել է Աշխարհի գավաթին պատրաստվելու և առաջիկա հարսանիքի մասին։
«Մեր հարսանիքը կկայանա սեպտեմբերի 30–ին Երևանում։ Բանն այն է, որ շախմատիստի կյանքը շատ բարդ է, և չես հասցնում հավաքվել ու ժամանակ ընտրել, իսկ ես ու Արիանան շատ զբաղված մարդիկ ենք»,– պատմել է Արոնյանը։
Շախմատիստի հարսանիքի ամսաթիվն ընտրված է` հաշվի առնելով ՖԻԴԵ–ի աշխարհի գավաթը, որը կանցկացվի սեպտեմբերի 2–ից 27–ը Թբիլիսիում։
Загружается новость ... "Лево"
«Կփորձեմ լավ խաղալ, պատրաստվում եմ ահա, սա իմ հնարավորությունն է մտնելու թեկնածուական մրցաշար, այդ պատճառով էլ պետք է հատկապես հավաքված լինել։ Արիանան կկարողանա գալ Թբիլիսի և երկրպագել ինձ»,– ասել է նա։
Արոնյանը նաև ասել է, որ գոհ է իր խաղից Grand Chess Tour Սինքֆիլդի գավաթի երրորդ փուլում, որտեղ ութերորդ տուրի արդյունքներով նա 5 միավորով կիսում է առաջին տեղը ֆրանսիացի Մաքսիմ Վաշիե Լագրավի և հնդիկ Վիշվանաթան Անանդի հետ։
Օգոստոսի 11–ին Արոնյանը իններորդ վճռորոշ տուրում կհանդիպի նորվեգացի գրոսմայստեր Մագնուս Կարլսենի հետ։ -0-