ԵՐԵՎԱՆ, 11 դեկտեմբերի. /Նովոստի Արմենիա/. Առաջին պարալիմպիկ լեռնադահուկային առաջնությունը կկազմակերպվի 2018 թվականի հունվարի 30-ից 31-ը Ծաղկաձորում, այսօր լրագրողների հետ հանդիպմանը հայտնեց Հայաստանի դահուկային սպորտի ֆեդերացիայի նախագահ Գագիկ Սարգսյանը:
Ինչպես նշեց Սարգսյանը, առաջնությանը կմասնակցեն մարզիկներ Իրանից, Վրաստանից, Բուլղարիայից, Ռուսաստանից, Լեհաստանից ու 12 մարզիկ Հայաստանից:
Նրա խոսքով, առաջնությունը կանցկացվի Հայաստանի ազգային պարալիմպիկ կոմիտեի հետ ստորագրված համագործակցության մասին հուշագրի շրջանակում, և պատմական իրադարձություն կդառնա երկրի համար: Սարգսյանը նշել է, որ եթե Հայաստանի ամեն մի ֆեդերացիան նպաստի պարալիմպիկ սպորտի զարգացմանը երկրում, ապա կձևավորվի հզոր մարզական համակարգ:
Загружается новость ... "Лево"
«Փոքր քայլերով մենք կարող ենք նպաստել սահմանափակ կարողություններով մարդկանց համար դահուկային մարզաձևերի զարգացմանը Հայաստանում», - ասաց Սարգսյանը:
Հայաստանի ազգային պարալիմպիկ կոմիտեի նախագահ Հակոբ Աբրահամյանն իր հերթին ավելացրեց, որ նրանք վաղուց են համագործակցում ՀՀ դահուկային սպորտի ֆեդերացիայի հետ:
«Հիմա այդ համագործակցությունը պաշտոնական բնույթ կկրի: Առաջինը կդառնա դահուկային սպորտի առաջնությունը», - նշել է Աբրահամյանը:
Նա նշեց, որ կոմիտեն ակտիվ համագործակցություն է սկսել նաև Միջազգային պարալիմպիկ կոմիտեի հետ:
Աբրահամյանի խոսքով, Ազգային պարալիմպիկ կոմիտեն մտադիր է համագործակցության հուշագիր ստորագրել բասկետբոլի, լողի, աթլետիկայի, վոլեյբոլի և այլ մարզաձևերի ֆեդերացիաների հետ: -0-