Աշխարհի նախկին չեմպիոն Արթուր Աբրահամը պատրաստվում է վճռորոշ մենամարտի (ՎԻԴԵՈ)

ԵՐԵՎԱՆ, 12 հուլիսի. /Նովոստի–Արմենիա/. Արթուր Աբրահամը Facebook–ի իր էջում տեսանյութ է հրապարակել, թե ինչպես է պատրաստվում Քրիս Յուբենկ կրտսերի հետ մենամարտի։

IBO պաշտոնական էջի համաձայն, WBO վարկածով երկրորդ միջին քաշով աշխարհի նախկին չեմպիոն, 37–ամյա Աբրահամի (46 հաղթանակ, 5 պարտություն, 30 նոքաութ) և 27–ամյա Յուբենկ կրտսերի (24 հաղթանակ, մեկ պարտություն, 19 նոքաութ) մենամարտը կկայանա հուլիսի 15–ին Լոնդոնում։


Ինչպես հայտնում է championat.com պորտալը, Կրիս Յուբենկ – Արթուր Աբրահամ մենամարտի հաղթողը կդառնա Բռնցքամարտի համաշխարհային սուպերսերիայի մասնակից և մենամարտ կանցկացնի Յուրգեն Բրեմերի հետ։

Իր նախորդ մենամարտն Աբրահամն անցկացրել է ապրիլի 23–ին և հաղթել լեհ Ռոբին Կրասնիկին։

Հաղթանակը հնարավորություն է ընձեռել Աբրահամին հավակնել երկրորդ միջին քաշային կարգում WBO չեմպիոնի տիտղոսին։ Ներկայում այդ գոտին պատկանում  է Գիլբերտո Ռամիրեսին, ով ավելի վաղ հաղթանակ էր տարել Աբրահամի նկատմամբ։ -0-