Հայ ըմբիշներ Արթուր Ալեքսանյանն ու Կարապետ Չալյանը դուրս եկան Տոկիո–2020–ի կիսաեզրափակիչ

ԵՐԵՎԱՆ, 2 օգոստոսի./Նովոստի-Արմենիա/. Հունահռոմեական ոճի ըմբիշ, գործող օլիմպիական չեմպիոն Արթուր Ալեքսանյանը դուրս է եկել Տոկիո-2020-ի կիսաեզրափակիչ: Նա քառորդ եզրափակչում 5-1 հաշվով առավելության է հասնել Ֆինլանդիայի ներկայացուցիչ Արվի Մարտին Սավոլայնենի նկատմամբ, հաղորդում է armsport.am–ը։

Կիսաեզրափակչում Ալեքսանյանի մրցակիցը կլինի իրանցի ըմբիշ Մոհամադհադի Սարավին։ Կիսաեզրափակչի երկրորդ զույգը կազմել են ռուսաստանցի անվանի ըմբիշ Մուսա Եվլոևն ու լեհ Թադեուշ Միչալիկը։

Ալեքսանյանը պայքարը սկսել էր 1/8 եզրափակչից, որտեղ գոտեմարտել էր Ղրղզստանի ներկայացուցիչ 25-ամյա Ուզուր Ջուզուպբեկովի հետ և 4-1 հաշվով հաղթանակ տարել։

Հունահռոմեական ոճի ըմբիշ, 77 կգ քաշային Կարապետ Չալյանն իր առաջին Օլիմպիական խաղերը ևս մեկնարկեց հաղթանակով։

Տոկիո-2020-ում նա նախ 5-0 հաշվով հաղթեց 2021թ. Ասիայի չեմպիոն, ուզբեկ Յալգաշբայ Բերդիմուրատովին, ապա՝ քառորդ եզրափակչում, 2-1 հաշվով առավելության հասավ Ռուսաստանի ներկայացուցիչ Ալեքսանդր Չեխիրկինի նկատմամբ և դուրս եկավ կիսաեզրափակիչ։–0–