ԵՐԵՎԱՆ, 18 հունիսի. /Նովոստի-Արմենիա/. Հայտնի իսպանացի մարզիչ Վիսենտե Դել Բոսկեն, ով Հայաստան է ժամանել Հայաստանի ֆուտբոլի ֆեդերացիայի հրավերով, երեքշաբթի լրագրողների հետ զրույցում հայտարարեց, որ ՀՀ հավաքականի վերջին երկու հաղթանակները կարևոր քայլ է համարում նոր հաջողությունների հասնելու համար:
Հայաստանի հավաքականը հունիսի 8-ին իր առաջին հաղթանակն է տարել Եվրո-2020-ի ընտրական փուլում` հաղթելով Լիխտեյնշթեյնի հավաքականի 3:0 հաշվով: Իսկ հունիսի 11-ին հայ ֆուտբոլիստները երկրորդ անգամ անընդմեջ հաղթանակ են տարել` հաղթելով Հունաստանի թիմին` 2:3 հաշվով:
«Շնորհավորում եմ Հայաստանի Ֆուտբոլի հավաքականին երկու անընդմեջ հաղթանակների կապակցությամբ, քանի որ դա մոտեցնում է բոլոր հայերի երազանքը` մասնակցել Եվրո-2020 եզրափակչին», - ասաց Դել Բոսկեն:
Ըստ նրա, երկու վերջին հաղթանակները, բացի արդյունքից, շատ դրական լիցքեր են հաղորդել Հայաստանի թիմին:
«Սեպտեմբերին շատ կարևոր խաղեր կլինեն Հայաստանի հավաքականի համար: Այդ երկու հաղթանակները վստահություն ու հանգստություն տվեցին ֆուտբոլիստներին և երկրպագուներին, ինչը շատ կարևոր է հետագա նպատակների հասնելու համար», - նշեց Դել Բոսկեն:
Ըստ նրա, հիմա երկրպագուները լիովին իրավունք ունեն նոր հաղթանակներ պահանջել ազգային թիմից:
Ֆուտբոլի ֆեդերացիայում Դել Բոսկեն դասախոսությամբ հանդես եկավ հայ մարզիչների համար:-0-